Атамай ыһыаҕын көрсө нэһилиэнньэ күргүөмүнэн турунна

Атамай ыһыаҕын көрсө нэһилиэнньэ күргүөмүнэн турунна

Бэс ыйын 12 күнүгэр, Арассыыйа күнүгэр Атамайга Кыайыы болуоссатыгар нэһилиэк уопсай субуотунньуга ыытылынна. Олохтоохтор Сэбиэскэй Сойуус Дьоруойа В.Д.Лонгинов төрөөбүтэ 100 сылыгар аналлаах Ыһыаҕы көрсө күргүөмүнэн үлэҕэ туруннулар.


Субуотунньукка Атамай нэһилиэгин оҕолоро да, кырдьаҕастара да кытыннылар. Ол курдук, Атамай нэһилиэгин бочуоттаах олохтооҕо Савва Николаевич бу да субуотунньугу көтүппэтэ. Нэһилиэк киэн туттар олохтооҕо Валентина Николаевна сибэкки олордуутугар сүрэҕин баҕатынан көмөлөстө. Кинилэр уопсастыбаннай үлэҕэ кыттыылара эдэр ыччакка үтүө холобурунан буолла.

Биллэриллибит аахсыйаҕа сайыҥҥы сибэкки рассаадатын үтүө дьон тутан кэллилэр, ол иһигэр нэһилиэк дьокутааттара Филиппов Д.А., Ефремова М.Н., нэһилиэк олохтоохторо Васильева А. Д., Филиппова М.В., Павлова А.В., оскуола үөрэнээччитэ Катя Антонова.

Бу күн оскуола оҕолоро, үлэһиттэрэ болуоссакка сайыҥҥы кэрэ сибэккини олортулар.

«Нэһилиэк ханнык да уопсастыбаннай үлэтиттэн туора турбат саамай көхтөөх кэрэ аҥардарбыт болуоссат тула күрүөтүн кырааскалаатылар. Эр дьон Аҕа баһылыкпытын Роман Кононовиһы кытта фонтаны өрөмүөннээн, үлэлэтэн көрдүлэр. Ыһыах иннигэр, сезон арыллыытыгар бэлэмнээтилэр.  Болуоссакка киирии ааны уларытан оҥордулар. Көхтөөх кыттыыны ылбыт нэһилиэкпит олохтоохторугар, оҕолоругар махтанабыт!» — диир Алла Филипповна Павлова, баһылык солбуйааччыта.

Ааптар: «Үлэ күүһэ» хаһыат

Добавить комментарий