Хамаҕатталар Олоҥхо ыһыаҕар Уус Алданнары, Абыйдары көрсүөхтэрэ

Хамаҕатталар Олоҥхо ыһыаҕар Уус Алданнары, Абыйдары көрсүөхтэрэ

Нам сиригэр, Эҥсиэли хочотугар XIII республикатааҕы Олоҥхо ыһыаҕа бу тирээн кэллэ. Хас биирдии олохтоох, нэһилиэк дьоно-сэргэтэ сүргэлэрэ көтөҕүллэн, үлэ-хамнас буолан, түбүккэ түһэн бэлэмнэнии үгэнигэр сылдьаллар. Хамаҕатта нэһилиэгэ хайдах бэлэмнээҕин билсиэҕиҥ. 


Иван Максимов, Хамаҕатта нэһилиэгин баһылыга:

Олоҥхо ыһыаҕар бэлэмнэнии улуус үрдүнэн үгэннээн бара турар. Нэһилиэкпитигэр эрдэттэн комиссиялары тэрийбиппит, ыытыллар үлэни торумнаабыппыт, онон үлэ былаан быһыытынан баран иһэр. Биир сүрүн болҕомтону тупсарыныыга уурабыт. Ол курдук, нэһилиэкпит чэрчитинэн баннердары уларытыы бара турар, барыта 70 буолуохтаах, манна “Принт-сервис” ООО  кытта үлэлэһэбит. Ону кытта трассаны кыйа баар 100 уот остуолбатыгар Олоҥхо фондатыттан бэриллэр флажоктары ыйыахпыт. Сибэкки олордуутугар икки палисадникпыт конструкциятын уларытан, саҥардан оҥоробут. Автобус тохтуур остановкаларын сахалыы тыыннаан, эбии киэргэтэн биэриэхпит. Тупсарыы үлэтэ барыта Олоҥхо концепциятын тутуһан ыытыллар. Улууспут киинигэр пааркаҕа 19 нэһилиэк  ыалдьыттары көрсөргө балаҕан оҥордо. Биһиги балаҕаммытын Кобяков Г.А. бэдэрээт быһыытынан оҥортордо. Нэһилиэкпит дьоно-сэргэтэ Уус Алдантан, Абыйтан кэлэр делегациялары көрсөргө бэлэмнэнэр. Ону таһынан сүүһүнэн ыалдьыттары Н.П. Габышев аатынан “Эрчим” СК, “Сарыал”, “Кытылчаан” оҕо уһуйааннарыгар түһэриигэ бары усулуобуйа тэриллэ сылдьар. ХСФЛ интернатыгар ыһыах үөрүүлээх аһыллыытыгар кыттар оҕолор лааҕырынан олорон репетициялана сылдьаллар. Бары тэрээһин үлэҕэ В.Г. Уодай салайааччылаах МАУ күүскэ үлэлэһэр, ону таһынан депутаттар, бары общественнай түмсүүлэр, тэрилтэлэр күүс-көмө буолан туруна сылдьаллар. “Ыһыах ыспыт” пааркабытыгар субуотунньугунан саҥа тутууларын кырааскалаатыбыт, ыраастаатыбыт, хаппыт мастары хомуйдубут. Манна барыта 80-ча киһи үлэлээтэ. Ол түмүгэр 25 куб бөх сыбаалкаҕа тиэлиннэ. Субуотунньугу тэрийиигэ тутууну ыыппыт Г.А. Кобяков, М.А. Бурнашев үлэ хайысхатын сүрүннээтилэр, туттар тэрилинэн, аһылыгынан хааччыйдылар.

Улуус дьаһалтатын комиссията үлэ хаамыытын билсэн барбыта, баар итэҕэстэргэ ыйыы оҥоһуллубутун туораттыбыт. Ол да буоллар кэккэ  ыарахаттар бааллар: “Эрчим” СК фасадын тупсарыыга үбүлээһинэ харгыстанан турар, ону кытта тутар этэрээккэ сайаапкабыт быһаарылла илик. Түгэнинэн туһанан, Эҥсиэлибит хочото-Олоҥхо туоната буолан ыалдьыттары сөхтөрдүн, онно кылааппытын киллэриэҕиҥ диэн ыҥырабын!

Д.Р. Протопопова, баһылык солбуйааччыта:

Мин общественнай түмсүүлэр Олоҥхо ыһыаҕын көрсө үлэлэриттэн сырдатыам. Көҕөрдүү үлэтигэр эппиэттээҕинэн т/х специалиһа Г.Ф. Габышева анаммыта, сибэкки рассадатын түөлбэ олохтоохторуттан хомуйан олордууну тэрийиэхтээх. Ыһыахха туттуллар 100 м ситиини М.Н. Аманатова көҕүлээһининэн нэһилиэк активист дьахталлара өрөн, технология учуутала, уус Р.А. Захаров чорооннору чочуйан,  МАУ уолаттара куба быһыылаах сибэкки олордор иһиттэри оҥорон улуус фондатыгар бириэмэтигэр туттарбыттара. Түөлбэ олохтоохторо нэһилиэк гербэтин өҥүн туһанан сиэдэрэй олбохтору тиктилэр. Чааһынай урбаанньыттарбыт үлэлэрин сырдатар буклеттар, бэлэххэ сувенирдар баар буоллулар. Сахалыы таҥас тиктиитигэр маастар-кылаастары “Түһүлгэ” НАК тэрийдэ. Ыалдьыттары көрсүүгэ, ыһыах аһын тэрийиигэ нэһилиэк олохтоохторо бары кыттыһыахтара, онно анаан “Чороон уонна кытыйа” акция ыытылынна. Бүтүн республика мустар Олоҥхо ыһыаҕар улууспут аатын өрө тутарга кыттыыны ыларбыт олус үөрүүлээх!

Татьяна Гаврильева, “Түһүлгэ” НАК уус-уран салайааччыта:

Улууспутугар үрдүк таһымнаах, дириҥ суолталаах Олоҥхо ыһыаҕын тэрээһинигэр культурнай-маассабай хайысхаҕа  кыттыыны ылабыт. Биһиги нэһилиэктэн сыана уонна спорт бэтэрээнэ Е.Р. Леонтьев олоҥхоһут Бэдьээлэ эһэтэ Дьаакып оҕонньор, улуус баһылыгын солбуйааччы П.В. Абрамов Мымах кинээс оруолларыгар кыттыахтара. Чороонноох үҥкүүгэ, салама ыйыыр, түптэ уматар сиэргэ-туомҥа “Ретро-Данс”, “Айыы Хотун” бөлөхтөрө бэлэмнэнэ сылдьаллар. О.И. Попова, А.Е. Сивцева салайааччылаах үҥкүү кылааһын үөрэнээччилэрэ “эрэкэ-дьэрэкэ” оҕолорго кыттыһыахтара. Ырыаһыттарбыт тойуксуттарга, маассабай түһүлгэҕэ 50 киһи таҥнан-симэнэн киириэҕэ. Олоҥхо туонатыгар программа быһыытынан икки күнү быһа фольклор жанрдарыгар күрэхтэр буолаллар. “Түһүлгэ” НАК фольклорга салайааччыта О.М. Кудрина дьарыктыыр “Күбэй”, “Түһүлгэ” уонна ХСФЛ бөлөхтөрө чабырҕахха бэлэмнэнэ сылдьаллар, тойуксуттар күрэхтэригэр биирдиилээн кыттыахтара.  Кыыс кэрэ Наммыт сиригэр, Олоҥхобут ыһыаҕар бука бары тоҕуоруһа түмсүөҕүҥ! 

Ааптар:  Мария Винокурова

Добавить комментарий

Ваш e-mail не будет опубликован. Обязательные поля помечены *