Мэҥэ Хаҥалас социальнай үлэһиттэрэ Бүтүн Арассыйатааҕы көрүүгэ үрдүк ситиһиилэннилэр

Мэҥэ Хаҥалас социальнай үлэһиттэрэ Бүтүн Арассыйатааҕы көрүүгэ үрдүк ситиһиилэннилэр

Мэҥэ-Хаҥалас улууһун социальнай эйгэ исписэлиистэрэ Сочига буолбут IV Бүтүн Арассыыйатааҕы көрүү-куонкуруска ситиһиилэннилэр. Тэрээһин сүрүн сыала-соруга ‒ тустаах салаа тэрилтэлэрин суолталарын үрдэтии, аныгы кэм ирдэбилинэн инбэстииссэйэҕэ кыттыыларын ситиһии.


Мэҥэ-Хаҥалас улууһун сокуоннай саастарын ситэ илик оҕолорго социальнай-реабилитационнай киин исписэлиистэрэ Валерия Баишева уонна Лилия Расторгуева бу куонкурус бастакы кэтэхтэн ыытыллыбыт сүүмэрдиир түһүмэҕин икки номинациятын ситиһиилээхтик ааспыттара.  Финалга тахсан Саха Сирин аатыттан баран кытыннылар. Кинилэр куонкуруска Арассыыйа араас муннуктарыттан кэлбит биир идэлээхтэрин кытары күөн көрүстүлэр. Москва, Иркутскай, Саратов, Братскай, Йошкар-Ола,  Омскай, Томскай, Краснодар уонна да атын куораттартан барыта 60 үлэ анал сүбэ дьүүлүгэр таһаарылынна.

Куонкурус түмүгүнэн “Тэрилтэ бастыҥ презентацията” номинацияҕа Мэҥэ-Хаҥалас улууһун социальнай-реабилитационнай киинин үлэһиттэрэ тэрилтэни билиһиннэрэр видео-клиптарын уонна слайдыларын көрдөрөн  бочуоттаах иккис миэстэни ситистилэр.

Оттон “Бастыҥ инновационнай социальнай бырайыак” номинацияҕа Валерия Баишева авторскай бырыйыагынан бастакы миэстэни ылан, өйдөбүнньүк куубагынан, мэтээлинэн, Сочи куорат бастыҥ отелларыгар сынньанар 6 босхо путевканан наҕараадаланна. Итини сэргэ кини кыайыылаах тахсан,  үлэлиир тэрилтэтэ ‒ Мэҥэ Хаҥаластааҕы сокуоннай саастарын ситэ илик оҕолорго социальнай-реабилитациялыыр киин 12 үлэһитин хаартыскалара Арассыыйа бастыҥ үлэһиттэрин Бочуотун дуоскатыгар тахсар чиэскэ тигистилэр.

Куонкуруска бу номинацияҕа барыта 40-ча үлэ кытынна. Кырдьаҕастар, инбэлииттэр дьиэлэрэ уонна да атын социальнай хайысхалаах тэрилтэлэр  бырайыактарын көмүскээтилэр. Биһиги курдук оҕолору кытары үлэлиир тэрилтэ суоҕа. Бу бырайыакпынан былырыын социальнай-реабилитациялыыр киин тэрилтэлэрин икки ардыларыгар кыайыылаах тахсан, өрөспүүбүлүкэтээҕи “Үүнэр көлүөнэ” пуондата олохтообут Граныгар тиксэн, тэрилтэбит 500 тыһыынча солкуобайынан бириэмийэлэммитэ, ‒ диир Валерия Яковлевна. ‒ Ити харчыга тэрилтэбит үлэтигэр-хамнаһыгар наадалаах араас тиэхиньикэлэри, тэриллэри, оҕолорго оонньуурдары атыыласпыппыт. Маннык көрүүлэр, куонкурустар ыытыллаллара олус наадалаах. Инники үлэҕэ көҕүлээһин, үлэ уопутун атастаһыы хайаан да наада.

Ити курдук, улуус, өрөспүүбүлүкэ чиэһин дойду таһымынааҕы куонкурска ситиһиилээхтик көмүскээбит социальнай эйгэ тэрилтэтин тутаах үлэһиттэрин биир дойдулаахтара истиҥник эҕэрдэлииллэр.

Ааптар: Алена Докторова

Добавить комментарий

Ваш e-mail не будет опубликован. Обязательные поля помечены *