Мээндийэҕэ бааһынайдар ыһыахтаатылар

Мээндийэ сайылыкка Бүтүн Арассыыйатааҕы бааһынай хаһаайыстыбалар ассоциацията (АККОР) тэриллибитэ 30 сылыгар уонна Саха Өрөспүүбүлүкэтин тыатын хаһаайыстыбатын үтүөлээх үлэһитэ, РФ үтүөлээх фермерэ, „Олокоос“ бааһынай хаһаайыстыба баһылыга  Василий Васильевич Смирников төрөөбүтэ 65 сылыгар анаммыт Саха сирин бааһынайдарын ыһыаҕа буолла. 


Олус кэрэ айылҕалаах киэҥ нэлэмэн алааска Мээндийэ сайылык ыһыахтыырга анаан оҥоһуллубут түһүлгэтигэр араас улуустартан үрүҥ илгэни үрүлүтээччи, эмис эти дэлэтээччи бааһынай хаһаайыстыбалар, Тыа хаһаайыстыбатын министиэристибэтиттэн, Ил Түмэнтэн, улуус дьаһалтатыттан тоҕуоруһа муһуннулар. Сайыҥҥы күн барахсан ыраас халлаанынан, чэмэлкэй күнүнэн ыһыах дьонун уруйдуу көрүстэ.

Ыһыаҕы арыйыы сиэригэр-туомугар сибэккилии симэммит кыталык кэриэтэ кыргыттар, боотур уолаттар хомус дьүрүскэн тыаһыгар уйдаран үҥкүүлээн дайдылар, түптэ торҕо күөх буруотун унаартылар. Сайыны уруйдуур кэрэ муусуканан доҕуһуолланан, өрөспүүбүлүкэ бастыҥ бааһынайдара сэлэлии хаамсан параадтаан киирдилэр. Алгысчыт Валерий Герасимов үрдүк айыылартан көрдөһөн аал уокка айах тутта, алгыһын анаата.

Бу бэлиэ күҥҥэ Василий Васильевич Смирников  сырдык кэриэһигэр анаммыт Мэҥэ тааһы арыйыы долгутуулаах түгэнин ыһыахха мустубуттар ытыс тыаһынан доҕуһуоллаатылар. Анал сабыыны арыйар чиэс Тыа хаһаайыстыбатын миниистирэ Александр Атласовка, Чурапчы улууһун баһылыгын эбээһинэһин толорооччу Алексей Ноговицыҥҥа, Василий Васильевич уолугар Дмитрий Смирниковка тигистэ. Мэҥэ тааска „Мээндийэҕэ ынах маҥырыа, сылгы кистиэ, оҕо саҥата чугдаарыа…“ диэн алгыс тыллар суруллубуттар.  Бу тыллар туолалларыгар ис сүрэхтэн баҕарыллар, эрэниллэр.

Ыһыах үөрүүлээх чааһыгар эҕэрдэ бастыҥа этилиннэ, таһаарыылаах үлэлээхтэргэ наҕараадалар туттарыы буолла. Олор истэригэр Чурапчыттан Мария Луковцеваҕа „Чурапчы улууһун Бочуоттаах гражданина“, Иннокентий Барашковка «Тыа хаһаайыстыбатын бэтэрээнэ» ааттары иҥэрдилэр, Петр Трофимовка „Улуус сайдыытыгар киллэрсибит кылаатын иһин“ үһүс истиэпэннээх, Мария Саввинаҕа „Саха сирэ Арассыыйаҕа холбоспута 385 сыла“, Афанасий Бубякиҥҥа „Тэрилтэни сайыннарыыга үтүөлэрин иһин“, Афанасий Сивцевкэ  „Ытык аҕа“,  Зинаида Илларионоваҕа „Фермерскэй  хаһаайыстыбалары сайыннарыыга киллэрсибит кылаатын иһин“ бэлиэлэри,  Мотрена  Марковаҕа Тыа хаһаайыстыбатын министиэристибэтин, Елена Захароваҕа  Дьахталлар тэрилтэлэрин сойуустарын бочуотунай грамоталарын, Спиридон Иустиновка махтал суругу туттардылар. Ыһыахха кэлбит бааһынайдар бары кэриэтэ наҕараадаланан, сыаналаах бэлэҕи тутан  сүргэлэрэ көтөҕүлүннэ, инники үлэлэригэр ситиһиилээх буоларга санаалара күүһүрдэ.

Өрөспүүбүлүкэтээҕи бааһынай хаһаайыстыбалар ассоциациятын уонна ыччат министиэристибэтин икки ардыларыгар бииргэ үлэлээһин дуогабарыгар илии баттаһыытын бэлиэ түгэнэ буолла. Дуогабарга ассоциация салайааччыта Александр Артемьев, Ыччат политикатыгар уонна социальнай коммуникацияҕа миниистирэ Степан Саргыдаев илии баттаатылар.

Ыһыах сиэрин-туомун быһыытынан  кыынньар кымыһынан утаҕы ханнардылар, эмис үтэһэлээх этинэн, ас арааһынан тото-хана түһүлгэлээн олорон  аһааһын буолла. Талба талааннаахтар самаан сайыны уруйдаан, ыллам ырыаны тардан кэбистилэр.

Күүстээхтэр, быһыйдар күөн көрсүһүүлэрэ улахан хатыһыылаахтык, илин-кэлин түсүһүүлээхтик  барда. Саастарынан араарыллыбыт буолан, тэҥ күүстээхтэр күрэстэрэ ыалдьааччылар өттүлэриттэн ыһыылаах-хаһыылаах, өрө күүрүүлээх буолла.

Бастаабыкка убаһа бириистээх куонкурустар буоллулар. 60-тан үөһээ саастаахтарга „Супер-фермер“, „Төрүт дьарыгы өрө тутааччы ыччаттарбыт“, „Кэллэ, кэллэ, ыллыыр кэммит дьэ кэллэ“ куонкурустар бэрт тэрээһиннээхтик ыытылыннылар. Убаһалары Сылаҥтан Владимир Макаров, Мырылаттан эдэр фермер Константин Макаров, Төлөйтөн „Олокоос“ бааһынай хаһаайыстыбатын салайааччыта Дмитрий Смирников туруордулар.

Ааптар: «Саҥа олох» хаһыат

Добавить комментарий

Ваш e-mail не будет опубликован. Обязательные поля помечены *