Грузияҕа кыстаабыт саха ыала

Сүүстэ истибиттээҕэр биирдэ көрбүт ордук диэн сахалар мээнээҕэ эппэттэр. Билигин харчылаах эрэ буолларгын аан дойду ханнык баҕарар муннугар тиийиэххин сөп. Ол эрээри ыраах дойдуга эдэр дьон үлэлии, кыстыы барыылара – сонун көстүү.

Виктор Кривогорницын оҕо эрдэҕиттэн билиигэ-көрүүгэ тардыһыылаах буолан, бэйэтин сытыы-хотуу майгытыгар да сөп түбэһиннэрэн биир сиргэ олорон хаалбат, өрүү саҥаны көрдүү, бэйэтигэр сөптөөх суолу тобула сатыыр эдэр киһи. Виктор Youtube ханаалыгар “Ханнык эрэ” диэн сахалыы тыллаах блогтаах. Кини кэргэнин Валерияны кытта хас даҕаны дойдуну кэрийэн көрөн бараннар, былырыын күһүн Грузияҕа кыс­тыырга, үлэлииргэ санаммыттара. Соҕуруу Азияҕа уһуннук сылдьарга көҥүл ирдэнэр. Оттон Грузияҕа биир сыл визата суох олоруохха сөп эбит, онно эбии килиимэтэ, айылҕата кэрэхсэппит. Манна кыһынын ичигэс, саамай тымныыта – 50 кыраадыс, ол эрээри сытыы тыаллаах. Эдэр дьон докумуоннара табыллан, үс күн иһигэр хомунан, Грузия Тбилиси куоратын ортотугар баар буола түспүттэрэ.

Виктор Грузияҕа кыс­тааһын туһунан маннык кэп­сиир: “Грузия алтынньы ыйдааҕы халлаана сылаастык көрсүбүтэ. Грузияҕа элбэх омук олорор, үс тылынан көҥүллүк бы­­һаарсыахха сөп: грузинныы, нууччалыы уонна английскайдыы. Көһөн тиийээт, олорор сирбитин көрдөөн барбыппыт, хата, табыгастаах дьиэни булбуппут. Интернет нөҥүө сакаас ылан үлэлээн барбыппыт. Грузияҕа олорорго, үлэлииргэ табы­гастаах эбит диэн түмүккэ кэллибит. Холобур, грузиннар харчылара – 1 лари 25 солкуобайга тэҥнэһэр. Биһиги ыйдааҕы ороскуоппутун барытын сурунан, ааҕан испиппит. Бу олорон харчыга быстарыыны, үлэҕэ атахтаныыны барытын көрүстүбүт. Кэргэмминиин харчыга улаханнык охтубат буола сатыыбыт. Сүрүнэ — үлэттэн дуоһуйууну ылыахтаахпыт, олохпут суолун көрдүүбүт”.

Манна даҕатан эттэххэ, Грузияҕа аан дойдутааҕы туризм күүскэ сайдыбыт дойдутунан буолар. Бу дойдуну биир нэ­­диэлэ иһигэр кэрийэн кэ­­лиэххэ сөп. Инфраструктура сайдыылаах буолан, баҕарбыт сиргэр, хайдах баҕарар, төһө баҕарар сыанаҕа тиийиэххин сөп. Манна туристары ордук кумах ку­­йаар, Алазанскай хочо, халлааҥҥа харбаһар Кавказ хайалара о.д.а. угуйаллар. Устуоруйа быыһын сэгэтэн көрөр эбит ­буоллахха, “Солко суола” манан ааһар этэ. Бу суолунан төһөлөөх атыы-эргиэн дьоно сындалҕаннаах айаны ааспыта буолуой? Бэрт былыргыттан винону оҥоруу сайдыбыт. Виноград саадтара ыраахха диэри нэлэһи­йэн сыталлар. Арыгыны оҥоруу, табаҕы үүннэрии – олох­тоох дьон төрүт дьарыктара. Ол да буоллар, уулуссаҕа итирик киһини көрсүбэккин, бэрээдэги кэһии дэҥҥэ тахсар.

Виктор тас дойдуга хас биирдии киһи табыллан сылдьыыта, дьону кытта биир тылы булуута бэйэтиттэн тутулук­таах диир. Манна эбии киһи бэйэ бодотун көрүнэн, ханнык баҕарар эйгэ дьонун кытта билсэн, бодоруһан сылдьан олоҕун суолун өссө кэҥэтэр, сайыннарар диэн санаалаах.

Виктордаах Валерия олоҕу көрүүлэрэ биир – бириэмэни туһалаахтык атаарыы, бэйэни сайыннарыы. Кинилэр инники былааннара өссө да киэҥ, соруктара элбэх. Онон, эдэр ыалга табыллыыны баҕарабыт.

«Саха сирэ» хаһыакка, edersaas.ru саайтка анаан

Ньургуйаана ЕФРЕМОВА.

1
0

Добавить комментарий