Өлөөннөр быйыл да бастыырга суоттаналлар

Саха сирин норуоттарын VII спортивнай оонньууларын хамаанданан киирсиитин төрдүс бөлөҕөр Абый, Аллайыаха, Анаабыр, Үөһээ Халыма, Эдьигээн, Өлөөн, Муома, Орто Халыма улуустара күөн көрсөн, ким бастыҥын быһаарсыахтара. Маныаха, сылыктааһын быһыытынан, Өлөөн улууһа күүстээҕинэн ааҕыллар. Бу хамаандалартан өлөөннөр сүүмэрдиир күрэхтэһиилэр түмүктэринэн саамай элбэх кыттааччылаахтар. Хамаанда састаабын уонна бэлэмин туһунан биһиги сайтпытыгар анаан Өлөөн улууһун “Сардаҥа” хаһыатын кылаабынай редактора Дмитрий Дмитриевич Скороходкин маннык билиһиннэрэр.

Өлөөн хамаандатын Амматааҕы оонньууларга барыта 60 спортсмен көмүскүөҕэ. Хамаанданан көрүҥнэргэ: мини-футболга, волейболга (дьахталлар), оҕунан ытыыга уонна аэробикаҕа кыттабыт – диир Дмитрий Дмитриевич. – Оттон биирдиилээн көрүҥнэргэ, көҥүл тустууга эр дьоҥҥо – Азия чөмпүйэнээтин үрүҥ көмүс призера, Саха сирин хас да төгүллээх чөмпүйүөнэ, норуоттар икки ардыларынааҕы кылаастаах спорт маастара Семен Семенов кыттыаҕа. Биллэрин курдук, кини былырыын Чурапчыга ыытыллыбыт, оонньууларга сүүмэрдиир күрэхтэһиигэ 97 киилэҕэ үһүс миэстэни ылбыта. Итини тэҥэ көҥүл тустууга уолаттарга түөрт кыттааччылаахпыт.

Оҕунан ытыыга соторутааҕыта Намҥа ыытыллыбыт төрүт оҕунан ытыыга күрэхтэһии муҥутуур кыайыылааҕынан буолбут спорт маастарыгар кандидат Марианна Винокуроваҕа улаханнык эрэнэбит. Манна даҕатан эттэххэ, кини ааспыт маннык оонньууларга үһүс бириистээх миэстэҕэ тахсан, боруонса мэтээлинэн наҕараадаламмыта.  

Бокска икки уоллаахпыт. Марафоҥҥа Марианна Васильева уонна Петр Захаров күүстэрин холонуохтара. Чэпчэки атлетикаҕа оҕолорго Саша Винокуров уонна Максим Шеин кыттыахтара.

Хамаанданан көрүҥнэргэ өссө пляж волейболугар дьахталларга сүүмэрдээһинэ суох, тэрийээччилэр ыҥырыыларынан хамаандабыт кыттыаҕа. Паралимпийскай көрүҥҥэ буулдьанан ытыыга Иван Николаев тургутуһуо.

Хамаандабыт бэрэстэбиитэлэ – улуус дьаһалтатын спорка отделын кылаабынай исписэлииһэ Владислав Васильевич Семенов. Бэҕэһээ, хамаанда хас биирдии киһитигэр саҥа спортивнай форма оҥотторон түҥэттибит. Футболистарбыт уонна волейболистарбыт өрөспүүбүлүкэ киин куоратын спорка саалаларыгар анал бэлэмнэниини бардылар. Аммаҕа, Өлөөн улууһун баһылыга Александр Степанович Иванов кэлэн, хамаандаҕа күүс-көмө, өйөбүл буолуоҕа.

Бөлөхпүтүгэр сүрүннээн Муома уонна Эдьигээн хамаандаларын кытта сүрүн миэстэ иһин киирсэрбит буолуо. Сыалбыт – бастакы миэстэ. Онуоха төрүөттэр бааллар. 2014 сыллаахха Намҥа ыытыллыбыт Саха сирин норуоттарын VI спортивнай оонньууларыгар бэйэбит бөлөхпүтүгэр бастакы миэстэни ылбыппыт. Бу да сырыыга кыайар санаалаахпыт.

Петр ПАВЛОВ.      

Хаартыскаҕа: Өлөөн хамаандатын эрэлэ, охчут Марианна Винокурова.

0
0

Добавить комментарий