Муома ытык кырдьаҕаһын эгэлгэ дьарыгын биир дойдулаахтара сөҕөллөр

Муома ытык кырдьаҕаһын эгэлгэ дьарыгын биир дойдулаахтара сөҕөллөр

Муома Соболооҕун олохтооҕо, сэрии сылларын оҕото Д. Е. Хабарова үйэтин-сааһын тухары үлэлээн, билигин сынньалаҥҥа олордор даҕаны, дьарыга элбэх, дьон-сэргэ билиниитин, оҕо-аймах тапталын, биһирэбилин ылыан ылар. Кини 5 сиэннээх, 5 хос сиэннээх. Аныгы олоҕу кытары тэҥҥэ хаамсан Инстаграмҥа тус страницалаах, интернет ситиминэн хото туһанар.


Соболоох олохтооҕо Д.Е.Хабарова кыһыҥҥы күннэргэ быыска-арыкка оҕолоругар оҕуруонан  тиһэр, сороҕун атыылаан биэнсийэтигэр эбинэр. Бэйэтэ кэпсииринэн, кини 3 тыһ. тахса билэни тиспит.

Сааһын оҕуруот түбүгэр түһэн помидордарын, биэрэстэрин, оҕурсуларын өрүс эстээтин кытта тэпилииссэҕэ буорга олордор. Кэтэх хаһаайыстыбатыгар Точка, Айтыына, Көмүстүүрэ диэн биэлэрдээх. Куурусса иитэр баҕа санаалаах. Кыһын, саас эрдэ туран хаамар идэтин сөргүтэн быйыл бастакытын бөһүөлэк пуордугар скандинавскай торуоскаланан хаамарын саҕалаабыт. Нэһилиэккэ ыытыллар тэрээһиннэргэ көхтөөх кыттыыны ылар. Быйылгы Улуу Кыайыы күнэ олус үчүгэй этэ диэн кэпсиир. Сэрии сылларын оҕолоругар сылын ахсын өйдөбүнньүк бэлэх биэрэллэр, полевой куукунаҕа аһаталлар. Оскуола оҕолоро сэрии сыллардааҕы тиэхиньикэни оҥорбуттарын сэргии көрбүтүн бэлиэтиир.

Айымньылаах үлэ кутаатын өйдөрүгэр-санааларыгар, сүрэхтэригэр-дууһаларыгар сөҕүрүппэккэ илдьэ сылдьар, олохторун усталаах туоратыгар эбээһинэһи, эппиэтинэһи туохтааҕар да үрдүктүк тутар маннык дьон баарын киэн туттабыт.

Ааптар: Николай  КОРЯКИН

Добавить комментарий