Аэробикаҕа Дьокуускай куорат хамаандата бастаата

Кэнники кэмҥэ Сахабыт сиригэр аэробика көрүҥэ сайдан, бу спордунан дьарыктанааччы элбээн иһэрэ үөрдэр. Ол курдук, Амматааҕы спартакиадаҕа юниордарга, улахан дьоҥҥо  12-лии хамаанда кэлэн күрэхтэстилэр.

Аэробика спорт көрүҥүн быһыытынан бу иннинэ Намҥа буолбут күрэхтэһиигэ аан бастаан киллэриллэн турар. Онтон быйыл буолбут күрэхтэһиигэ спорт бу биир кыраһыабай көрүҥэ тупсан, сайдан иһэрин бэлиэтиэххэ наада. Спортсменнар өссө былырыын Аммаҕа буолар оонньууларга кыттар иһин сүүмэрдээһини ааспыттара.

Юниордарга уонна улахан дьоҥҥо 12-лии хамаанда талыллан полуфиналга күөн көрүстүлэр. Юниордарга Дьокуускай, Чурапчы, Уус Алдан, Саха сиринээҕи студеннар спортивнай сойуустара, Амма, Сунтаар, Мэҥэ-Хаҥалас, Нам, Ньурба, Горнай, Таатта, Өлөөн хамаандалара киирбиттэр. Бастакынан   Дьокуускай куорат хамаандата юниордарга күрэхтэһиини  саҕалаата. Бииртэн биир кыраһыабай, күүстээх хамаандалар тахсан бэйэлэрин  программаларын көрдөрдүлэр.  Стадиоҥҥа сүрдээх элбэх көрөөччү мустан, кыттааччыларга кыайыыга күүс-уох эбэн биэрдилэр. Юниордарга финалга алта хамаанда ааста: Дьокуускай куорат, Чурапчы, Горнай, Өлөөн, Ньурба уонна Саха сиринээҕи студеннар спортивнай сойуустарынхамаандата. Кыайыылааҕынан Дьокуускай  куорат хамаандата таҕыста. Үрүҥ көмүс мэтээл Чурапчы, боруонса мэтээл хаһаайыннарынан Ньурба хамаандалара буоллулар.

Ыалдьааччылар ортолоругар Дьокуускай куорат 17 нүөмэрдээх оскуолатын учуутала Галина Семеновна Гаврильеваны көрүстүм. Кини аэробика көрөргө наһаа интэриэһинэй эбит диэн бэлиэтиир:

— Хамаандалар бары да наһаа бэлэмнэммиттэр, таҥастара-саптара, тэтимэ, тас көрүҥнэрэ — барыта киһини умсугутар. Аммаҕа анаан-минээн алын кылааска бэйэм үөрэппит кыргыттарбар ыалдьа кинилэри көрөөрү кэлбитим. ВАНС диэн ааттаах, Саха студеннарын спортивнай сойуустарын хамаандатын аатыттан күрэхтэстилэр. Үс иһигэр киирбэтилэр буолан баран, төрдүс миэстэ буоллулар. Бу күрэхтэһиигэ кэлэн кыттыбыттара да, улахан кыайыы дии саныыбын, ситиһиилэр инники да кэлиэхтэрэ диэн алгыыбын. Манна бэлиэтээн эттэххэ, атын хамаандалар анаан талыллыбыт, сүүмэрдээһини ааспыт буоллахтарына, бу хамаанда бары биир кылаас кыргыттара. Кыргыттар бэйэлэрэ ВАНС диэн ааты өссө начальнай кылааска үөрэнэ сылдьан толкуйдаабыттар. В – Варя уонна икки Викалар, А-Алеся, Анина, Н – Нарьяна, С-Сахаайа диэн ааттарын бастакы буукубатыттан таһаарбыттар. Кинилэри начальнай кылааска үөрэнэ сырыттахтарына, учууталлар Галина Семеновна фитнес-аэробика секциятыгар суруйтарбыт. Онтон ыла бииргэ тутуспутунан сылдьаллар.

Улахан дьоҥҥо 12 хамаанда иһигэр Чурапчы, Нам, Таатта, Бүлүү, Амма, Мэҥэ Хаҥалас, Өлөөн, Ньурба, Горнай, Уус Алдан, Дьокуускай, Саха сиринээҕи студеннар спортивнай сойуустара ки ирбиттэр. Итинтэн финалга эмиэ алта хамаанда талыллан киирдэ: Дьокуускай, Горнай, Ньурба, Өлөөн, Бүлүү, Чурапчы. Кыайыылааҕынан туох да мөккүөрэ суох Дьокуускай куорат хамаандата таҕыста. Иккискэ Чурапчы уонна үһүскэ Ньурба спорсменнара.

Аэробикаҕа кылаабынай судьуйа Лилия Дмитриева:

— Күрэхтэһиигэ конкуренция олус үрдүк, Республикаттан 12 бастыҥ хамаанда өссө былырыын талыллан киирбиттэрэ. Техникаҕа уонна артистичноска диэн 2-лии судьуйа арахсан дьүүллээтилэр.  Критерийдара элбэх, техника5а физическэй бэлэмнэрин, таһымнарын сыаналаатылар. Спортсменнар икки мүнүүтэ иһигэр тэтимнээх музыканан элбэх элеменнэри оҥоруохтаахтар. Үрдүк ыстаныылары, маахтары (махи), партер, акробатическай элеменнэриоҥоро-оҥоро үҥкүүлээн тохтообокко, тэтимнээхтик баран иһиэхтээхтэр. Программа уопсай таһыма төһө уустуга эмиэ учуоттанар. Быйыл спортсменнар таһымнара  харахха быраҕыллар гына эбиллибитэ көстөр. Лидердэр эмиэ уларыйбыттар. Холобур, Намҥа улахаттарга СВФУ хамаандата бастаабыта, юниордарга  Чурапчы этэ. Ити курдук  Саха сирин  7 спортивнай оонньууларыгар аэробика көрүҥэ түмүктэннэ. Сүрдээх кыраһыабай, тэтимнээх буолан,аэробика түһүлгэтэ үгүс көрөөччү болҕомтотун тарта. Бу көрүҥ салгыы сайдарыгар Сахабыт сиригэр бары кыах барыта баар эбит диэн уонна маннык тыҥааһыннаах киирсиилэри, кэрэ, кыраһыабай көстүүлэри, ол эрээри олус уустук күрэхтэһиини бэлэхтээбит спортсменнарбытыгар, тренердарга, судуьуйаларга уонна тэрийээччилэргэ барҕа махталбытын тиэрдэбит.  

Туран-Тв ютуб-ханаалыгар аэробика түһүмэҕин туһунан видеоблог таҕыста:

edersaas.ru саайтка анаан Людмила Соловьева.

0
0