Ньурбалар буоксаҕа үс финалистаннылар

Бүгүн, от ыйын 6 күнүгэр, Саха сирин норуоттарын VII спортивнай оонньууларыгар буоксаҕа полуфиналга 10 ыйааһыҥҥа 20 паара кииристэ. Ол иһигэр Ньурба улууһуттан — 4 боксуор.


Саамай чэпчэки — 49 кг диэри ыйааһыҥҥа Николай Матвеев утарсааччытын, Таатта бэрэстэбиитэлин Михаил Тимофеевы бастакы рауҥҥа күүстээх охсуунан нокдауҥҥа ыытан, ыраас кыайыыны ситистэ.

Егор Васильев (64 кг) Бүлүүттэн сылдьар Валентин Гатиловы баһыйа тутта. 64 кг диэри ыйааһыҥҥа сэрэбиэй Алквиад Ивановка Ньурбаттан төрүттээх, Дьокуускай куорат аатыттан кыттар күүстээх спортсмеҥҥа Петр Васильевка тиксэрдэ. Бу олус түргэн уонна чуолкай хамсаныылардаах, биир кэм хамсыы сылдьар буолан таптарара да уустук Петр Васильев Уһук Илиҥҥи федеральнай уокурук элбэх төгүллээх чөмпүйүөнэ, үгүс турнирдар кыайыылаахтара. Онон бэрди бэрт баһыйда, Петр Васильев кыайыылаах таҕыста. Ньурба дьоно кинини аан дойдуга кикбоксиҥҥа икки төгүллээх чөмпүйүөн Василий Васильев уолунан билэллэр. Салгыы полуфиналга Ньурба улууһун биир кэскиллээх боксуора Виталий Филиппов (69 кг ) бэрт тыҥааһыннаах киирсиигэ Александр Дмитриевы (Мэҥэ Хаҥалас) кыайда. Инньэ гынан 6 боксуортан аҥардара финалга тиийдэ. Бу уонна атын да ыйааһыннарга араас улуустартан кэлбит тирии бэрчээккэ маастардара сытыы уонна кыраһыабай киирсиилэри көрдөрдүлэр.

Ааптар: Геннадий Антонов

Добавить комментарий