Волонтердар спортивнай оонньуулар тэрээһинигэр сыралаһаллар

Волонтердар спортивнай оонньуулар тэрээһинигэр сыралаһаллар

Аммаҕа ыытылла турар Саха сирин норуоттарын VII оонньууларыгар волонтердар төһүү күүс буолаллар. Ол курдук күрэхтэһиилэр тэрээһиннээхтик ааһалларын, кэлбит дэлэгээссийэлэр, ыалдьыттар Амма туһунан үтүө өйдөбүллээх хаалалларын туһугар тус кылааттарын киллэрэллэр.


Волонтер ыстаабыгар 140 киһи баҕа өттүнэн суруттаран үлэлии-хамсыы сылдьар. Салайааччы Конон Леонидович Артемьев кэпсииринэн, ыстаабка 16 саастарыттан 61 саастарыгар диэри дьон баар.

Мантан 60-чата оскуола оҕолоро, абитуриеннар, эдэр ыччат. Волонтердар кэккэлэригэр улуус устуоруйатын, кэрэ, бэлиэ миэстэлэрин билэр олохтоох дьону хомуйбуппут. Горнайтан Амматтан төрүттээх ыччат управлениетын исписэлииһэ Назаров С.В., Чурапчыттан оскуола оҕото Федорова Фаина баар.


10 хайысханан арахсан (аккредитация, арыаллааһын, сэрэхтээх буолуу, транспорт уо.д.а. өттүнэн), тэрийэр кэмитиэт биэрбит сайаапкатынан үлэлии барабыт. Икки бөлөхтөөхпүт. Бастакы team-лидер бөлөххө дьаһайар дьон бааллар. Кинилэр 5-10-нуу киһилээх бөлөх үлэтин сүрүннүүллэр. Зонтиктарбытын Дьокуускайдааҕы центр волонтерства, улуус дьаһалтата кэтэр формабытынан хааччыйбыта. Стадион таһыгар көһө сылдьар штабтаахпыт. Тоҥнохпутуна, онно киирэн иттэбит, аһыыбыт. Оҕолор, ыччат хара сарсыардаттан киэһээҥҥэ диэри үлэлэригэр бэриниилээхтик сылдьаллар. Кими даҕаны чорботон эппэппин. Бары биир тэҥнэр, — диэн кэпсээтэ волонтер ыстаабын салайааччыта.

Зинаида Ивановна Бугаева, ХИФУ естественнай наукаларын институтун 1 кууруһун бүтэрбит:
Мин бу бастакы уопутум. Волонтер буоларга күһүн сайаапкабын биэрбитим. Волонтердуур наһаа сэргэх эбит, саҥа дьону кытта билсэҕин, алтыһаҕын. Ханна ыҥырдылар да, онно баран иһэҕин. Дьон үксүн суолу, спортивнай объектар, маҕаһыыннар ханна туралларын ыйыталаһаллар.

Улуус историятын инники үөрэппиппит. Ханна да ыксаабат, чуҥкуйа сылдьар дьону көрүстэхпитинэ, төһө кыалларынан Амма туһунан кэпсии, билиһиннэрэ сатыыбыт. Тоҥнубут да, тута солбуйан иһэллэр. Хааччыллыыбыт үчүгэй, — диир волонтер кыыс Зинаида Бугаева.

Бу курдук биир биэс харчыта суох түбүгүрэ сылдьар волонтердар Амма киэҥ туонатыгар спортивнай бырааһынньык таһымнаахык ааһарыгар бары болҕомтолорун, кыһамньыларын уураллар.

Ааптар: ulusmedia

Добавить комментарий