Хаҥаласка «ТАБЫС» бэстибээл чэрчитинэн «МИР» дьыалабыай оонньуу буолла

От ыйын 12 күнүттэн Хаҥалас улууһун «Орто дойду» этнокомплексыгар «ТАБЫС» («Таптаа, алҕаа, байыт ытык сиргин») диэн ыччат бэстибээлэ буола турар. «ТАБЫС» ыччат бэстибээлин чэрчитинэн «МИР» («Молодежная инициатива в республике») диэн дьыалабыай оонньуу ыытылынна.

«МИР» дьыалабыай оонньуу кыттыылаахтара

Дьыалабыай оонньууну Саха сирин Уопсастыбаннай балаатата Ыччат бырабыыталыстыбатын уонна СӨ бырабыыталыстыбатын уонна бэрэсидьиэнин дьаһалтатын кытта Сомоҕолоһуу сылын «Народный правотворец» бырайыагын чэрчитинэн  тэрийдэ. Маныаха тэрийээччилэр ыччаттан 24 үтүө көҕүлээһини, ону тэҥэ М.К. Аммосов аатынан Хотугулуу-Илиҥҥи федеральнай университеттан 17 этиини хомуйдулар.

Оонньуу түгэнэ.

Бэстибээлгэ кэлбит ыччат хамаандаларга арахсан, бырайыактары көмүскээтэ. Маныаха национальнай бырайыактар хайысхаларын туһаннылар — демография, дьиэлэнии, доруобуйа харыстабыла, цифровой экономика, култуура уо.д.а.

Кыайыылааҕынан култуураҕа уонна дьиэлэниигэ сыһыаннаах бырайыактар таҕыстылар. Амматтан сылдьар Саргылаана Неустроева санаатын үллэстэр:

— Биһиги бырайыакпыт дьиэлэниигэ уонна куорат эйгэтин тула буолла. Ол курдук, манна үс хайысханан үлэлээтибит: уулуссаҕа дьарыктанар сирдэри тэрийии, тыа пуондатын туһанан дьон олорор сирин кэҥэтии уонна эдэр исписэлиистэри дьиэнэн хааччыйыы. Манна демографияны, дьарыктаах буолууну, үлэтэ суох буолуу аччыырын таарыйдыбыт. Ыччаты таарыйар тыын боппуруостары тобулбут буоламмыт спикердэр интэриэстэрин тартыбыт быһыылаах. Бырайыакпытын араас улуустан алта ыччат буолан толкуйдаатыбыт.

«МИР» дьыалабыай оонньуу туһунан ХИФУ юридическэй факультетын деканын солбуйааччы Яна Ядреева кэпсиир:

— Саамай табыллыбыт үлэлэр Уопсастыбаннай балаата иһинэн баар «Народный правотворец» бырайыакка киирсиэхтэрэ. Бу түмүгэ алтынньы ыйга биллиэҕэ. Манна диэн эттэххэ, хамаанданан эрэ буолбакка биирдиилээн киһи эмиэ кыттан, бэйэтин көҕүлээһинин кэпсиэн. бырайыак оҥорон көмүскүөн сөп. 

Айтана Аммосова, edersaas.ru

Ааптар уонна Анастасия Алексеева хаартыскаҕа түһэриилэрэ.

0
0

Добавить комментарий