Айанньыт хараҕынан: Сунтаарга суол өрөмүөнүгэр үлэ далааһына киэҥ

Айанньыт хараҕынан: Сунтаарга суол өрөмүөнүгэр үлэ далааһына киэҥ

Ааспыт нэдиэлэҕэ үлэм наадатынан Сунтаартан Мииринэй куоракка бара сырыттым. Бу өйдөөтөххө, быкыһын хаардаахтан ол диэки айанныы илик эбиппин. Күккүрэттэн саҕалаан суол өрөмүөнүгэр үлэ бөҕө бара да турар эбит (хас килэмиэтир оҥоһуллубутун, оҥоһуллуохтааҕын, кимнээх үлэлииллэрин эридьиэстии барбакка, көннөрү боростуой айанньыт киһи хараҕынан көрбүппүн ойуулуу түһүөм).


Улахан омуна суох, биһиги, сорохтор үйэбитигэр да харахтаан көрбөтөх араас тиэхиньикэ суолга үлэлии бөҕө сылдьар. Аллыҥа-Тойбохой икки ардыгар түһүүлэнэн, аспаал собуота үлэлээн тигинэтэ турар. Дьэ, көрүөххэ астык, сэргэх көстүү. Ити үлэ тохтообокко салҕанан бардар дуу диэххэ. Тойбохой-Кириэстээх икки ардыгар суол үлэтигэр билиҥҥитэ чуумпу. Ол өйдөнүллэр, суол үлэтэ ханна көтөн бара-бара ыытыллыай?

Оттон Кириэстээххэ бэйэтигэр таас оскуола тутуута саҕаламмыт. Бэйэбит олохтоох уолаттарбытын сэргэ араас омук уолаттара бэрт иллээхтик, үөрэ-көтө үлэлии сылдьаллар.

Кириэстээх уҥуоруттан алмаастаах Мииринэйгэ диэри суол аҕыйах сыллаахха кыараҕаһынан, туруга да мөлтөҕүнэн аналыгар соччо эппиэттэспэт курдуга. Онно холоотоххо, билигин чыҥха атын хартыына буолан эрэр эбит. Өрөмүөн, саҥардан оҥоруу үлэтэ бөҕө барар турар. Дьэ, чахчы Усть Кутка тиийэргэ аналлаах суол сорҕото буолара билиниллибит кэриҥнээх.

Уһун айаҥҥа итинник ону-маны саныы истэххэ, суол уһуна биллибэккэ да хаалар ээ. Хайа уонна таксиспыт Петр Николаев сыыйылыннаран түһэн түргэнэ, хас биирдии айанньыт хаппырыыһын (салон иһэ сылааһын, сөрүүнүн, муусукатын табыгастаах гына оҥорон иһиитэ) толорор усулуобуйаны олохтоон иһэрэ айанныырга да астык, табыгастаах эбит.

Сорох ол-бу иирбэ-таарба санаабын ситэ-хото сыымайдыам иннинэ алмаастаах кыраай киин куоратыгар баар буола түһэбит. Мииринэй чахчы чөкө, ыраас, күөх куоратын өссө төгүл сөҕө, ымсыыра көрөҕүн. Биллэн турар, тыа киһитин сиэринэн аан бастаан ас сыанатын көрө түстэххэ, сыана син биир улахан уратыта суох курдук. Кырдьык, куорат иһигэр ханна да хаамп – үксэ кыргыыс омук буолбут быһыылаах. Убайдарбыт нууччалар дэҥҥэ көстөр курдуктар, ону даҕаны кырдьаҕас өттө.

Түмүктээн эттэххэ, улууспут иһигэр ханна даҕаны көхтөөх, күүрүүлээх үлэ барарыттан киһи эрэ үөрэр, оттон кыра итэҕэс-быһаҕас ханна барыай… Дойду үрдүнэн билиҥҥи курдук үп-харчы кырыымчык кэмигэр өрөспүүбүлүкэбит, улууспут иһигэр итинник далааһыннаах үлэлэр баралларыттан киэн туттуохпутун, итини туруорсан ылар салалтабытыгар махтаныах эрэ кэриҥнээхпит дии саныыбын. Кэбис доҕоттор, аһара кэҕиннибит, быһынныбыт-ойуннубут диэмиэҕиҥ дуу.

Ааптар: Борис НИКОЛАЕВ

Добавить комментарий