Ытык Күөл предпринимателэ элбэх оҕолоох дьиэ кэргэттэргэ бэлэх оҥорор

Ытык Күөл предпринимателэ элбэх оҕолоох дьиэ кэргэттэргэ бэлэх оҥорор

Хас сыл аайы Таатта улууһун Ытык Күөл нэһилиэгин «Уйгу» маҕаһыына Билии күнүгэр аналлаах аахсыйаны ыытара үтүө үгэскэ кубулуйда. Предприниматель Ванда Никифорова элбэх оҕолоох дьиэ кэргэттэри өйөөн оскуола табаарыгар чэпчэтиини көрдө. Итини тэҥэ быйыл оскуола боруогун саҥа  атыллыыр кырачааннарга «Первоклассник бэлэҕэ» набору буор-босхо туттарар.


Бу күннэргэ Ытык Күөлгэ «Уйгу» маҕаһыын балаҕан ыйын 1 күнүгэр бэлэмнэнэн оҕо оскуолаҕа кэтэр таҥаһыттан саҕалаан суумкатыгар, атах таҥаһыгар уонна үөрэнэр тээбириннэригэр тиийэ сааһылаан табаар эгэлгэтин таһаарбыт. Холобура, хас биирдии оҕоҕо наада буолар рюкзак суумка 500 солк. саҕаланар.

Маҕаһыын салалтата быйыл элбэх оҕолоохторго анал аахсыйаны биллэрбитин туһунан предприниматель Ванда Никифорова иһитиннэрдэ. Ол курдук элбэх оҕолоох (дастабырыанньаны илдьэ кэлэҕит, -ааптар) дьиэ кэргэҥҥэ оскуола бары табаарыгар 10% чэпчэтии уонна 1 кылааска киирэр кырачааннарга «Первоклассник бэлэҕэ» наборун босхо бэлэхтииллэр.

Онон улууспут олохтоохторо, элбэх оҕолоох дьиэ кэргэн бу үтүө санаа аахсыйатыгар кыттан, оҕолоргутун оскуолаҕа барар таҥастарын-саптарын саҥардан, үөрэн-көтөн үөрэх саҥа сылыгар үктэниҥ.

Ааптар: «Таатта» хаһыат