Кэбээйи нэһилиэгин уһуйааннара үөрэх дьылыгар бэлэмнэнэллэр

Кэбээйи нэһилиэгин уһуйааннара үөрэх дьылыгар бэлэмнэнэллэр

Кэбээйи нэһилиэгин уһуйааннарыгар быйылгы сылга салалта өттүгэр улахан уларыйыылар бардылар. Онон да сибээстээн оҕо саадтарын ис-тас оҥоһуутугар, өрөмүөҥҥэ былааннаммыт үлэлэр тэтимнэрэ үрдүк.


Быйыл Кэбээйитээҕи «Кустук» уһуйааҥҥа еврорадиатордары эбии олордуу үлэтэ эрдэттэн былааннаммытынан бүддьүөттэн 147 361,75 суума көрүллүбүтэ.

Ити үлэни бэдэрээтчит Афанасий Афанасьевич Лугинов ылан бэрт түргэнник уонна суобастаахтык, кэмигэр толордо. Бүгүҥҥү күҥҥэ уһуйаан тас өттүгэр кырааскалааһын, олбуору өрөмүөннээһин уонна ис өттүгэр кырааскалааһын, испиэскэ үлэтэ бара турар, — диэн сэбиэдиссэй эбээһинэһин толорооччу М.Я.Григорьева кэпсиир.

Онтон «Сардаана» уһуйааҥҥа Роспотребнадзор ирдэбилигэр эппиэттиир оҕо туалета оҥоһулунна. Сэбиэдиссэй эбээһинэһин толорооччу М.И.Новгородова кэпсииринэн, бу үлэни бэдэрээтчит Игорь Иванович Терехов ылан кэмигэр бүтэрбит. Үлэ бүддьүөттэн үбүлэннэ. Сууммата 30 480 01 солк. Маны таһынан уһуйаан тэлгэһэтигэр үлэһиттэр күүстэринэн оҕо оонньуур былаһаакката оҥоһуллан лаппа сэргэхсийии буолла.

«Кэскил» уһуйааҥҥа уу сүүрэр халдьытыгар үп көрүллэн ити үлэлэри бэдэрээтчит Иннокентий Иванович Терехов эмиэ үтүө суобастаахтык оҥорон кэмигэр туттарда.

«Уонна куукунаҕа благоустройство биир көрүҥэ диэн уу сылытардаах, септига суох да буоллар мойка оҥоһуллан эрэр. Ис өттүбүтүгэр кырааска, сууйуу-хомунуу бара турар», — диэн сэбиэдиссэй эбээһинэһин толорооччу Н.Ю.Дьяконова кэпсээтэ.

Оҕону кыра сааһыттан үтүөҕэ, сырдыкка уһуйар Кэбээйи уһуйааннара быйылгы үөрэх дьылын сылын аайы буоларын курдук саҥа күүһүнэн-уоҕунан, саҥа көрүүлэринэн саҕалыыр былааннаахтар.

Ааптар: Татьяна Максимова-Лазарева