media«Үтүө санаа» аахсыйатын Кубога Үөһээ Бүлүүгэ айаннаата
Бүгүн, атырдьах ыйын 18 күнүгэр, икки оройуон кыраныыссатыгар Түүкээҥҥэ орто оскуоланы 1985 сыллаахха бүтэрбиттэр истиҥ көрсүһүүлэрэ буолла. Ньурба улууһуттан саҕаламмыт «Үтүө санаа Кубога» Үөһээ Бүлүү улууһун дэлэгээссийэтигэр туттарылынна.
Икки өттүттэн ити кэмҥэ араас оскуолалары бүтэрбит 40-ча киһи көрүстэ. Ньурба улууһун нэһилиэктэрин кэрийэн элбэх үтүө дьыаланан туолбут, үгүс дьону үөрдүбүт тэрээһин Кубогын бу бырайыак ааптара, Антоновка оскуолатын выпускнига, улуустааҕы баайга-дуолга сыһыаннаһыыларга уонна муниципальнай атыылаһыыларга кэмитиэт бэрэссэдээтэлэ Сергей Михайлов үөрүүлээх быһыыга-майгыга Үөһээ Бүлүү улууһун дэлэгээссийэтигэр туттарда.
Ньурбатааҕы 1985 сыллаах выпуск салайааччыта Альбина Михайлова Ньурба улууһугар олорор выпускниктар бу күннэргэ үгүс үтүө дьыаланы оҥорбуттарын билиһиннэрдэ. Онтон аҕыйаҕы аҕыннахха, харчынан кыттыһан Ньурба куоракка улуустааҕы поликлиникаҕа 85 тыһ. солк. суумалаах спортивнай-оонньуур комплекс туруорарга улуустааҕы киин балыыһаҕа сэртипикээт туттардылар, комплексы выпускниктар соҕуруу сакаастаан бэйэлэрэ аҕалан таҥан туруоруохтара. 8 нэһилиэккэ кыһалҕалаах, наадыйар дьоҥҥо араас көмөнү оҥордулар, сквердэргэ мас олортулар, оскуолаларга, атын да тэрилтэлэргэ эмиэ көмөлөстүлэр. Ньурба куоракка Кырдьаҕастар уонна инбэлииттэр интэринээт-дьиэлэригэр тиийэн ыалдьыттаатылар, «Бичик» кинигэ кыһатын кинигэ бэлэхтэрин туттардылар. Соторутааҕыта Ньурба куоракка киһи өлүүлээх баһаарга эмсэҕэлээбит ыалга көмөнү оҥорууну көҕүлээччинэн буоллулар, олохтоох былаас уорганнара оҥорбут көмөлөрүн аахпакка эрэ, кылгас кэм иһигэр дьонтон харчынан 300-тэн тахса тыһ. солк. хомуллан киирдэ. Альбина Михайлова 1985 сыллааҕы выпускниктар үтүө дьыалаларын аахсыйатыгар көмөлөрүн иһин улуус баһылыга Алексей Иннокентьевка, улуус дьаһалтатын персоналы салайар сулууспатын салайааччыта Ольга Алексееваҕа махталын тиэртэ уонна «Кубок айана алгыстаах буоллун, Саха сирин олохтоохторун үтүө дьыала аахсыйатыгар түмэн, наадалаах дьоҥҥо көмө оҥоһулуннун«, — диэн түмүктээтэ.
Үөһээ бүлүүлэртэн харда махтал-эҕэрдэ тылларын СӨ оскуолаларын 1985 сыллааҕы выпускниктарын түмсүүтүн Сүбэтин чилиэнэ Маргарита Степанова эттэ. «Үтүө санаа Кубога» Ньурба улууһун выпускниктарыттан саҕаламмытын улаханнык биһириирин биллэрдэ, СӨ оскуолаларын 1985 сыллааҕы выпускниктарын түмсүүтүттэн Ньурба улууһун дьаһалтатыгар туһуламмыт Махталын Ольга Алексееваҕа туттарда. Салгыы Маргарита Степанова «Үтүө санаа кубогун актыыбыһа» значоктары Альбина Михайловаҕа тиксэрбитэ сонно тута бу үтүө дьыалаҕа ис сүрэхтэриттэн күүскэ көмөлөспүт Ньурба улууһун выпускниктарыгар туттарылынна.
Тэрээһини Таркаайы нэһилиэгин «Илгэ» вокальнай ансаамбыла (салайааччы СӨ култууратын үтүөлээх үлэһитэ Афанасий Моргусов) уонна Ньурба 1-кы нүөмэрдээх оскуолатын ырыаҕа учуутала Светлана Васильева эҕэрдэ нүөмэринэн киэргэттилэр. Тэрээһин өбүгэ саҕаттан дьону сомоҕолуур—түмэр аналлаах оһуохайынан түмүктэннэ.
Ааптар: Геннадий Антонов
