“Дьаам”  сайылык ыанньыксыттара өлгөм үүтү ыырга дьулуһаллар

“Дьаам”  сайылык ыанньыксыттара өлгөм үүтү ыырга дьулуһаллар

Амма улууһугар ыанньыксыттар ортолоругар сайыҥҥы ыйдарга үүтү ыаһыҥҥа үлэҕэ көҕүлүүр күрэхтэһии тэриллэр. “Дьаамнар” биирдии ынахтарыттан тоннаттан тахса үүтү ыан иһэллэр. 


Амма улууһун тыатын хаһаайыстыбатын управлениета сайыҥҥы түөрт ыйга ыанньык фермалар уонна ыанньыксыттар ортолоругар күрэхтэһии тэрийэр. Бу күннэргэ кылаабынай зоотехник Спиридон Капитонов от уонна бэс ыйдарга үүтү ыаһын түмүктэрин таһаарда.

Күрэхтэһиибитин үүттүгэннээх сайыҥҥы ыйдарга биллэрэн турабыт. Биһиги улууспутугар хас да хаһаайыстыбаҕа элбэх үүттээх Алтай сүөһүлэрэ бааллар. Кинилэр бэйэлэрин икки ардыларыгар күрэхтэһиэхтэрэ. Бүтэһиктээх түмүкпүтүн алтынньыга таһаарыахпыт. Онтон кыайыылаахтары наҕараадалааһын сылын аайы ыытыллар “Идэһэ” бырааһынньыгар буолуо”, — диэн этэр Спиридон Семенович. Кини ыанньык фермаларга сылдьан ким төһөнү ыабытын көрөн, ааҕан-суоттаан, бэс уонна от ыйдар түмүктэрин таһаарда. Алтайтан кэлбит сүөһүлээхтэргэ бастыҥ көрдөрүүнү Строд  аатынан хаһаайыстыба “Дьаам ” сайылык ыанньыксыттара ситистилэр. Ол курдук Матвей Устинов биирдии ынаҕыттан бу икки ыйга 1100,2 киилэ, Лена Ксенофонтова 1093,6 киилэ, Лилиана Анисимова 1032,7, Валентина Слепцова 1003,3 киилэ үүтү ыатылар. Онон “Дьаамнар” сайылык үрдүнэн валовайынан 1849,08 цн, онтон биирдии ынахтан ортотунан 1027,26 киилэ үрүҥ илгэни дибилиттилэр. Бу сайылыкка уопсайа 120 ынах сайылаан турар.

Ыанньыксыттары кытта кэпсэтиигэ кинилэр сүрүн кыһалҕаларынан сайын уот элбэхтик барар кэмигэр дизель суоҕа буолар. Чахчы да биир ыанньыксыт 30 ынаҕын күҥҥэ 3-тэ илиитинэн ыыра ыарахан буоллаҕа эбээт. Онон уот чаастатык барар кэмигэр ардыгар иккитэ да ыаһын тахсар. Бу барыта үүт ыаһыныгар охсоро чуолкай. Сайылык хотоннорго, кыстыкка даҕаны, дизельнай станция туруоруутугар управление хаһаайыстыбалары кытта үлэлэһиэн наада буолбут.

Онтон Сатаҕай нэһилиэгэр баар Т.С. Лукин аатынан хаһаайыстыба “Оһох” сайылыгар саамай элбэх үүтү Ирина Никитина ыан иһэр. Кини биирдии ынаҕыттан  бу сайыҥҥы икки ыйга 946,8 киилэни  ыата.

Күрэхтэһии салҕанар. Аны атырдьах уонна балаҕан ыйдарын түмүктэрэ тахсыахтара. Онтон бүтэһиктээх түмүк алтынньыга биллиэ.

Ааптар: “Амма олоҕо” хаһыат

Добавить комментарий