mediaНьурбаҕа Арассыыйа судаарыстыбаннай былааҕын күнүн өрөгөйдөөхтүк бэлиэтээтилэр
Ньурба улууһугар Арассыыйа судаарыстыбаннай былааҕын күнэ киэҥ ис хоһоонноохтук уонна өрөгөйдөөхтүк бэлиэтэннэ. Үөрүүлээх тэрээһин Ньурба куорат Степан Васильев аатынан болуоссатыгар оҕолор бырааһынньыктыы флэшмоб үҥкүүлэринэн саҕаланна.
Лоп курдук 10 чааска улуус баһылыгын 1-кы солбуйааччыта Артур Яковлев уонна Ньурба к. баһылыга Александр Иванов дойдубут судаарыстыбаннай символларыттан биирдэстэрэ буолар судаарыстыбаннай былаахпытын флагштокка өрөгөйдөөхтүк өрө көтөхтүлэр.
Арассыыйа судаарыстыбаннай былааҕын күнүгэр анаан ыытыллыбыт «Арассыыйа — мин дойдум!» фотоконкурс кыайыылаахтара наҕараадаларын туттулар. Ол курдук, Федеральнай нолуок сулууспатын 3 №-дээх оройуоннар икки ардыларынааҕы инспекцията — «Түмсүүлээх Арассыыйа» анал аат хаһаайына, «Широта просторов -широта мыслей» — Мотрена Гуляева , «Железный флаг — уверенная Россия» — Саргылана Егомина, «Россия без границ» — Даяна Лазарева, «Гражданскай патриотизм» — Екатерина Попова, «Лови момент, Россия» — Василий Михайлов кыайыылаах таҕыстылар.
«Дотронься до России» аахсыйа сэргэх тэрээһиннэрэ буоллулар. Арассыыйа туһунан ырыалар аукционнара ыытыллан, 2 киһи ыллаан бириистэринэн бэлиэтэннилэр. «Арчы» реабилитационнай Киин «Школа первоклашек» оҕолоро Арассыыйа туһунан хоһооннору аахтылар. Ким баҕалаах манна туруоруллубут улахан холустаҕа дойду былааҕа өҥнөрдөөх ытыстарын суолун түһэрдилэр. Тэрээһини эҕэрдэ нүөмэрдэр уонна оонньуулар киэргэттилэр.
Ленин болуоссатыгар «бэлисипиэт триала» күрэхтэһиигэ 29 киһи кытынна. Болуоссаты эргийэ уустук моһоллоох уонна элбэх эргиирдэрдээх маршрутунан күрэхтэстилэр.
Түмүккэ Ньурбатааҕы ДЮСШ тренерэ, Аммаҕа буолбут СӨ норуоттарын Спортивнай оонньууларын пляжнай волейболга призера Александр Андреев кыайыылаах тахсан, Lenovo tabE10 планшетынан наҕараадаланна. 2 миэстэлээх Айсен Егомин (Антоновка оскуолата) — Samsung A10 уонна Валентин Кононов (Ньурба 1 №-дээх оскуолата) Honor 8A смартфону туттулар.
Арассыыйа судаарыстыбаннай былааҕын күнүгэр анаан, улуус бибилэтиэкэлэригэр кинигэ быыстапкалара уонна дойду официальнай символларын туһунан бэсиэдэлэр, Ксенофонт Уткин аатынан Норуоттар доҕордоһууларын түмэлигэр «Мин ийэ дойдум дьоруойдарын туһунан» быыстапка ыытылыннылар.
Ааптар: Геннадий Антонов
