LETO YAKUTIA Горнайга бастакы муралы арыйда

LETO YAKUTIA өрөспүүбүлүкэтээҕи аныгы култуураны көрдөрөр бэстибээл чэрчитинэн бэҕэһээ Бэрдьигэстээххэ олус кэрэ көстүүлээх, киһи хараҕын үөрдэр мурал арылынна. Мурал диэн улахан истиэнэҕэ ойууланар уус уран уруһуйу ааттыыллар. Горнайга бастакы ойуу Софрон Данилов уулусса 75/1 дьиэтин таас эркинин киэргэттэ.


Мурал ойуутун нэһилиэнньэ бүттүүн куоластаан талбыта. Онно Горнай улууһун биир кэрэ, мааны сирэ, киэн туттар Сиинэбит 304 куолаһы ылан кыайыылаах тахсыбыта. Эскиз ааптарынан эдэр худуоһунньук Аяна Иванова буолар. Онон Аяна муралы бэйэтэ кэлэн уруһуйдаата, арыллыы тэрээһинигэр кыттыыны ылла.

LETO YAKUTIA бэстибээл чэрчитинэн өрөспүүбүлүкэ үрдүнэн 20 кэриҥэ арт-эбийиэктэр-мураллар оҥоһуллуохтара.

Бу үөрүүлээх күҥҥэ мурал оҥоһулларыгар көмөлөспүт улууспут бастыҥ ыччатыгар, “Улууспут туһугар” түмсүү волонтердарыгар, оскуола үөрэнээччилэригэр, дьиэ олохтоохторугар, урбаанньыттарга эҕэрдэ, махтал тыллары эттилэр.

Елизавета Семенова, научнай-методическай киин методиһа:

2021 сылга ыытыллыахтаах “Манчаары оонньууларыгар” бэлэмнэнэнэн бөһүөлэги киэргэтиигэ  бастакы саҕалааһын – бу мурал буолла. Муралга Сиинэбит уруһуйдаммыта даҕаны үгүс үтүө суолталаах. Пааркабыт Аал Луук маһын курдук, бу мурал улууспут биир бастыҥ кэрэ миэстэтэ буоллун. Дьон-сэргэ көрө-истэ, харыстыы сырыттыннар. Манна үлэлэспит ыччакка, волонтердарга махтал тылларын этэбит.

Аяна Иванова, уруһуй ааптара, живописец-худуоһунньук:

Мин бэйэм Мэҥэ-Хаҥалас Майатыттан төрүттээхпин. Нам педколледжын бүтэрбитим. Бу бэстибээл быйыл саҥа бастакытын президент гранын уонна худуоһунньуктар сойуустарын көмөтүнэн, идиэйэтинэн ыытыллар. Араас улуустарга арт эбийиэктэр оҥоһуллаллар.

Үлэбитин атырдьах ыйын 20 күнүттэн саҕалаабыппыт. Үс күн ньиргиччи үлэлээн, былааммытын, сорукпутун толордубут. Онно  олохтоохтор өйөбүллэрэ, көмөлөрө улахан тирэх буолла. Туох да ыарахаттары көрсүбэтим. Өрөспүүбүлүкэ таһымнаах бастакы холонуум буолла. Үлэбиттэн астынным. Волонтердарга махтанабын. Горнай дьоно олус түмсүүлээҕиттэн үөрдүм.

Сиинэ хайалара национальнай пааркаҕа киирэр, аан дойду таһымнаах өрөспүүбүлүкэбит биир мааны сиринэн биллэр.  Горнай дьонун Сиинэ хайалара бу курдук хаххалыы турдуннар, сырдык өҥнөрө сүргэни көтөхтүннэр.

Анна Иванова, Софрон Данилов уулусса 75/1 дьиэтин олохтооҕо:

Мурал оҥоһулларыгар дьиэбит олохтоохторо бары кэриэтэ, биир сомоҕо буолан үлэлэстилэр. Нэһилиэкпит олохтоохторо муралы харыстыы, көрө-истэ сылдьыҥ диэн ыҥырабыт. Бырайыак, бэстибээл ааптардарыгар истиҥ махталбытын тиэрдэбит.

Сиһилии “Үлэ күүһэ” хаһыат аныгыс нүөмэригэр ааҕаарыҥ.

Ааптар: Күннэй Алексеева

Добавить комментарий