Амма 1№-дээх орто оскуолатын хамаандата тоҕус оскуола ортотугар кыайыылаах

Амма 1№-дээх орто оскуолатын хамаандата тоҕус оскуола ортотугар кыайыылаах

Аммаҕа СӨ Ил Дарханын Кубогын XVI күрэхтэһиитэ ыытылынна. Тоҕус оскуола кыттыбытыттан  Амма 1№ — дээх орто оскуолата кыайыылааҕынан таҕыста. 


Үгэс буолбут СӨ Ил Дарханын Кубогын XVI эстафетата Амма стадионугар ыытылынна.  Соморсун, Абаҕа, Эмис, Сатаҕай, Алтан, Болугур, Амма үс оскуолалаларын хамаандалара бастыыр иһин күрэхтэстилэр. Сыл аайы инники сылдьар оскуолаларынан Амма 1№ -дээх,  Амма 2№ -дээх, Соморсун хамаандалара буолааччылар. Оттон быйылгы сүүрүүгэ үһүс миэстэни Абаҕа, иккиһи Амма 2№ — дээх оскуолата, бастакыны Амма 1№ — дээх орто оскуолата ылыан ылла. Бастакы оскуола өссө 2015 сыллаахха Президент Кубогар өрөспүүбүлүкэҕэ иккис миэстэни ылбыт уопуттаах. Кыайыылааҕынан тахсыбыт  хамаандаҕа маннык оҕолор сүүрдүлэр: Арсен  Федоров, Диана Захарова, Коля Слепцов, Валерия Федорова, Эрчим Максимов, Сандаара Никитина, Амаан Килбясов, Оля Неустроева, Сеня Николаев, Нарыйа Захарова, Толя Гаврильев. Оҕолору физкультураҕа Сергей Федоров, Айталина Борисова, Елена Константинова уонна Алексей Слепцов үөрэтэллэр.

Күрэхтэһии чаҕылхай «сулуһунан» иккис оскуола 11-с кылааһын үөрэнээччитэ Айтал Маркин буолла. Кини бу сайын Аммаҕа ыытыллыбыт Саха сирин VII спортивнай оонньууларыгар кыттан 800 м үһүс, эстафетаҕа бастакы миэстэ буолбута. Н.С.Захаров — Сахаачча аатынан спорт оскуолатын тренерэ Иван Саввин Айталы төрдүс сылын эрчийэр.

«Быйылгы балаһыанньанан стадионнаах уонна стадиона суох улуустар диэн араардылар. Улууска ыытыллыбыт күрэхтэһиини видеонан устуунан өрөспүүбүлүкэҕэ түмүк тахсар. Муҥутуур кыайыылаах Ил Дархан стипендиятынан уонна Кубогынан наҕараадаланыахтаах, ону таһынан улахан кылаас үөрэнээччитэ Ил Дархан Харыйатыгар сылдьыаҕа. Аммаҕа стадион баар буолбута маассабай спорт сайдыытыгар улахан оруоллаах буолуоҕа. Бүгүн элбэх хамаанда кэлэн кыттыбыта ону туоһулуур», — диэн этэр үөрэх салаатын иитэр үлэҕэ уонна эбии үөрэхтээһиҥҥэ сэбиэдиссэйэ Прокопий Бытыров,

Ааптар: Алтана Артемьева

Добавить комментарий