Амма бааһынатыгар Бунтовскойдар алтыс көлүөнэ ыччаттара үлэлииллэр

Амма бааһынатыгар Бунтовскойдар алтыс көлүөнэ ыччаттара үлэлииллэр

Амма Покровкатын бааһынатыгар бурдук хомуурун үлэтин үгэнэ. Манна Бунтовскойдар алтыс көлүөнэ ыччаттара бурдук үлэтигэр удьуордаан үлэлииллэр. 


Амма Покровкатын бааһыналарыгар күн — дьыл көнөн  хомуур үлэтэ үгэннээн барар. Роман Спасьев дириэктэрдээх 34 үлэһиттээх бурдугу үүннэрэр «Амма» акционернай уопсастыба биригээдэлэрэ сарсыарда эрдэттэн халлаан хараҥарыар диэри бурдук хомууругар сылдьаллар. Хомууру  кылаабынай агроном Назар Черкашин салайар.

Ааллаах бааһыналарын ыаллыы баар Болугур нэһилиэгиттэн Гаврил Константинов уонна Петр Лонгинов харабыллаан көмө буолаллар.

Хаһаайыстыба быйыл 1672 гектар сиргэ 500 -чэкэ гектарга нэчимиэни, 700 — чэкэ гектарга эбиэһи, 400 — чэкэ гектарга сэлиэһинэйи ыспыттар. Былырыыҥҥыга холоотоххо, 150 гектарынан элбэх сиргэ бурдугу ыспыттар. 1980 гектар паарданан эһиилги ыһыыга бэлэмнэммит. Манна биэс К-700 тыраахтардар үлэлээтэ. Бүгүҥҥү туругунан 600 гектар сиргэ бурдук быһылынна. Билиҥҥитэ гектартан 12-13 цн нэчимиэн,  19 цн эбиэс, 10 цн сэлиэһинэй хомулунна.  Хомуллубут нэчимэн, сэлиэһинэй Хаптаҕайдааҕы собуокка комбикорму бэлэмнээһиҥҥэ туттарыллар. Оттон эбиэһи улууспут хаһаайыстыбалара ылаллар. Тэрилтэ 642 тн оттоон былаанын эмиэ толорбут. Бурдугу хаалааһыҥҥа Амма оскуолаларын оҕолоро уонна Дьокуускайдааҕы тыа хаһаайыстыбатын академиятын устудьуоннара көмө буолаллар.

Бааһынаҕа 9 комбайн, ол иһигэр  4 саҥа «Вектор», биэс ЗИЛ массыыналар үлэлииллэр. Ааспыт кэмнэргэ соҕурууттан кэлбит дьон Амма сиригэр — уотугар кэлэн, Покровкаҕа олохсуйан сири оҥоруунан, бурдук ыһыытынан дьарыктанан күн бүгүнүгэр диэри үлэлииллэр. Ол иһигэр Польшаттан төрүттээх Иркутскай губерниятыттан кэлбит Бунтовскойдар алтыс көлүөнэ ыччаттара бааһынаҕа удьуордаан үлэлииллэр. Александр Бунтовской 1977 сылтан саҕалаан комбайн уруулугар олорор, үлэтин сөбүлүүр буолан билигин да үөрэ — көтө бурдук хомууругар сылдьар.

Уопуттаах комбайнер уола Александр Бунтовской манна үлэлээбитэ уонча сыл буолбут. Оттон сиэннэрэ Тулагы орто оскуолатын сэттис кылааһын үөрэнээччитэ Эрик Андреев уонна Покровка бэһис кылааһын үөрэнээччитэ Андрей Бунтовской эһэлэригэр көмө буолаллар. Эбэлэрэ Любовь Константиновна «Полюшко» ансаабыл салайааччыта, эдьиийдэрэ Марина Уварова бу тэрилтэ исписэлииһэ.

«Мин Тулагы орто оскуолатыгар үөрэнэбин. Сайын аайы ийэм дойдутугар кэлэн сайылыыбын уонна эһэбэр комбайҥҥа үлэлииригэр көмөлөһөбүн. Былырыын хамнас ыламмын үөрбүтүм. Покровкаҕа наһаа үчүгэй. Сынньанар бириэмэбэр өрүскэ астына сөтүөлүүбүн. Улааттахпына эһэм уонна убайым курдук комбайнер буолуом», — диир Эрик.

Ааптар: Алтана Артемьева

Добавить комментарий