Бүлүүлэр Герой Николай Степанов төрөөбүт Чолбоохой өтөҕүн ыраастаатылар

Бүлүүлэр Герой Николай Степанов төрөөбүт Чолбоохой өтөҕүн ыраастаатылар

Д.Г.Макаров аатынан “Бүлүү күөх эргимтэтэ” экология пуондата Бүтүн Россиятааҕы “Ыраас кытыл” эко-марафон чэрчитинэн “Уһук Илин ыраас кытыллара” тэрээһини улууска күүскэ көҕүлээн ыытта. Бастакынан Сэбиэскэй Сойуус Дьоруойа Николай Саввич Степанов төрөөбүт Чолбоохой өтөҕүн ыраастаан сөргүттүлэр.


Д.Г.Макаров аатын сүгэр “Бүлүү күөх эргимтэтэ” экология пуондата эдэр ыччаты төрөөбүт дойдуну таптыырга, улуус олохтоохторун тулалыыр айылҕаны харыстыырга ыытар үлэтэ сыллата киэҥ далааһыннанан, дьоҥҥо-сэргэҕэ биллэн, сэҥээриини ылан иһэр.

Дмитрий Гаврильевич Макаров Бүлүү лесхоһун дириэктэринэн үлэлиир кэмигэр тэрилтэни таһаарыылаахтык салайбыта, улуус дьокутааттарын Сэбиэтин эмиэ биир тутаах дьокутаата этэ. Кини өр сылларга Бүлүү лесхоһугар леснигынан үлэлээбит Сэбиэскэй Сойуус Дьоруойа Николай Саввич Степанов аатын үйэлэргэ үйэтиппит үтүөлээх. Билигин сылын аайы Бүлүүтээҕи лесничество тиэргэнигэр Герой бюһа турар скверигэр Николай Саввич Степановы кэриэстээн ахтан-санаан ааһар араас тэрээһиннэр ыытыллаллар.

Дмитрий Гаврильевич бииргэ төрөөбүттэрэ Ксения уонна Прасковья Гаврильевналар пуонда сүрүн көҕүлээччилэринэн буолаллар. Дириэктэр Прасковья Макарова түмүктээх үлэтинэн пуонда аата киэҥник ааттанан эрэр, “Бүлүү күөх эргимтэтэ” ааспыт сылларга элбэх суолталаах тэрээһиннэри көҕүлээн ыытта, дьону айылҕаны харыстыырга түмтэ. Бэл, аан дойдуга биллэр топ-модель Наталья Водянова пуондатын кытта суруйсан, куонкуруска кыттыһан, оҕо оонньуур былаһааккатын ылан, Бүлүүгэ аҕалан туруортарбыта элбэҕи этэр.

Быйыл пуонда Бүтүн Россиятааҕы “Ыраас кытыл” эко-марафон чэрчитинэн ыытыллар “Уһук Илин ыраас кытыллара” тэрээһини улууска күүскэ көҕүлээтэ. Тэрээһиҥҥэ пуонда тэрийбит оскуолатааҕы лесничестволара күүс-көмө буоллулар.

Эко-марафон бастакынан балаҕан ыйын 9 күнүгэр Николай Саввич Степанов төрөөбүт Чолбоохой өтөҕөр ыытылынна. Бу тэрээһиҥҥэ Бүлүү куоратыттан Дьоруой Н.С.Степанов аатынан оскуола үөрэнээччилэрэ, Хампа оскуолатын оҕолоро, улахан дьон кытыннылар. Тэрээһин кыттылаахтара ыраастааһын үлэтин кэннэ Дьоруой төрөөбүт өтөҕө саҥалыы тыыннаммытын бэлиэтээтилэр. Арыылаах нэһилиэгин баһылыгын солбуйааччы, пуонда Сэбиэтин кыттыылааҕа Савва Иванов тырааныспарынан хааччыйыыга, ыраастааһыны тэрийиигэ күүс-көмө буолла.

Хампалар балаҕан ыйын 11 күнүгэр олорор күөллэрин — Унаардаах эбэлэрин кытылын ыраастаатылар.

Балаҕан ыйын 10 күнүгэр Мастаах оскуолатааҕы лесничествотын кыттылаахтара, оскуола үөрэнээччилэрэ Дьоруой олорбут, үлэлээбит Балаҕаччытын аһатар баар суох эбэтин — Нарыдьыйаан күөл тулатын ыраастаатылар.

Итинник тэрээһиннэр улуус үгүс нэһилиэктэригэр тэрилиннилэр, Бүлүү куоратыгар педколледж устудьуоннара Эбэ кытылын хомуйдулар.

Балаҕан ыйын 10 күнүгэр пуонда Сэбиэтин бэрэссэдээтэлэ Алексей Евсеев салайааччылаах улуустааҕы экология иниспиэксийэтин кэлэктиибэ уонна пуонда кыттыылаахтара Бүлүү куорат Хомустааҕын кытылын – пуонда дендропаарка олохтуохтаах сиригэр ыраастааһын үлэтин ыыттылар.

Д.Г.Макаров аатынан экология пуондатын көҕүлээһининэн Бүлүү улууһугар “Ыраас кытыл” эко-марафон көхтөөхтүк, сэргэхтик ыытылынна.

Ааптар: Николай КУПРИЯНОВ

Добавить комментарий