Майаҕа эдэриттэн эмэнигэр диэри сүүрдүлэр

Чөл олоҕу, успуорду көҕүлүүр «Нациялар куруостара» Майаҕа бүгүн тэрээһиннээхтик ааста. Саха Өрөспүүбүлүкэтигэр 20-с сылын ыытыллар сүүрүүгэ үгэс быһыытынан элбэх киһи кытынна.


Быйыл куруоска Майатааҕы «Мичил» оҕону сайыннарар киин иитиллээччилэрэ сүүрсүбүттэрэ кэрэхсэннэ.

Хаалыктаах хаамыынан дьарыктанар аҕам саастаахтары сэргэ тэрилтэ салайааччылара быйыл эмиэ көхтөөхтүк кытыннылар.

Алын кылаас үөрэнээччилэрэ 1, үрдүкү кылаастар уонна улахан дьон 2 биэрэстэни Майинскай, Сэбиэскэй, Сыроватскай аатынан уулуссаларынан биэтэккэ бастыыр иһин илин-кэлин түһүстүлэр.

Быһый атахтаахтарынан Павлик Алексеев, Алеся Митрофанова, Элла Сергучева, Петя Корякин, Маша Баишева, Ганя Филиппов, Александр Чемезов о.д.а. буоллулар.

Сүүрүү бырааһынньыгын кыттыылаахтарын үөрэх управлениетын успуорт салаатын салайааччыта Николай Бугаев уонна Майа сэлиэнньэтин дьокутааттарын сэбиэтин бэрэссэдээтэлэ Павел Судико эҕэрдэлээтилэр.

Ааптар: Виктория Белолюбская

Добавить комментарий