Амма дэлэгээссийэтэ Москуба быыстапкатыгар ситиһиилээхтик кытынна

Амма дэлэгээссийэтэ Москуба быыстапкатыгар ситиһиилээхтик кытынна

Амма улууһуттан кыттыбыт «Амма» аһы – үөлү оҥорон таһаарар кэпэрэтиибэ, Болугур, Абаҕа бөдөҥ хаһаайыстыбалара уонна ветеринарнай салалта улахан наҕараадаҕа тигистилэр.


Москубаҕа норуот хаһаайыстыбатын ситиһиилэрин быыстапкатыгар «Көмүс күһүн» XXI Бүтүн Арассыыйатааҕы агропромышленнай быыстапка түмүктэрин таһаарда. Амма улууһун аатыттан барбыт дэлэгээссийэ үрдүк ситиһилээхтик кытынна. Ол курдук «Амма» аһы – үөлү оҥорон таһаарар кэпэрэтиибэ (дириэктэр Айысен Черноградскай) сыыра уонна арыыта кыһыл көмүс мэтээлинэн наҕараадаланна.

Оттон «Болугур» ТХПК (бэрэссэдээтэл Михаил Ксенофонтов) уонна И.Я.Строд аатынан ТХПК (бэрэссэдээтэл Василий Тимофеев) быыстапкаҕа туруорбут сылгылара атыыга бардылар уонна племенной иитиини сайыннарыыга  үрдүк ситиһиилэрин иһин эмиэ кыһыл көмүс мэтээлинэн наҕараадаланнылар.

СӨ ветеринария департамена (салайааччы Василий Бураев) Амматааҕы ветеринария салалтата (начаалынньык Игорь Анисимов) Амма нэһилиэнньэлээх пууннарыгар 2010 – 2018 сылларга лейкоз ыарыытын сэрэтиигэ уонна суох гыныыга ыыппыт үлэлэрин иһин үрүҥ көмүс мэтээлинэн бэлиэтэннилэр.

«2016 сыллаахха Амма сыыра эмиэ маннык улахан быыстапкаҕа биир бастыҥнарынан бэлиэтэнэн турар. Бу сырыыга сыырбытын уонна арыыбытын туруоран кыайыылааҕынан тахсан үөрүүбүт муҥура суох. Бу барыта урукку сыллартан күн бүгүҥҥэ диэри тыа хаһаайыстыбатын  бородууксуйатын оҥорон таһаарыыга түүннэри – күнүстэри үлэлии сылдьар бука бары дьоммут, салайааччыбыт Иван Николаевич Емельянов, тыа хаһаайыстыбатын министиэристибэтин үлэлэрин түмүгэ буолар,»-  диэн Амматааҕы тыа хаһаайыстыбатын оҥорон таһаарар кэпэрэтиибин дириэктэрэ Айысен Черноградскай үөрүүтүн үллэстэр.

Ааптар: Алтана Артемьева

Добавить комментарий