Кэбээйигэ үбүлүөйдээх бэтэрээннэри чиэстээтилэр

Кэбээйигэ үбүлүөйдээх бэтэрээннэри чиэстээтилэр

Кэбээйигэ  аҕам саастаахтар декадалара «Сайдам» норуот айымньытын киинигэр «В кругу друзей» диэн дьоро киэһэнэн түмүктэннэ. Ытык дьон итии чэйдээх остуол тула олорон ирэ-хото кэпсэттилэр, ааспыт сыллары санастылар.


Бырааһынньыкка тыыл бэтэрээннэрэ, сэрии сылын оҕолоро ыҥырыллан кэллилэр. Дьоро киэһэҕэ аҕам саастаахтары, үбүлүөйдээх кырдьаҕастары нэһилиэк баһылыга А.Н.Кобяков эҕэрдэлээтэ. Андрей Николаевич 90 саастарын туолбут Н.А.Сметанин, С.И.Спиридонова уонна ахсынньы ыйга 90 сааһын туолар О.М.Лугинова курдук ытык саастаах олохтоохтор биһиги кэккэбитигэр баалларынан киэн туттарын биллэрдэ.  Уонна аҕам саастаах олохтоохторго бөҕө доруобуйаны, ыалдьыбаттарыгар баҕарда. Бэтэрээннэр сэбиэттэрин бэрэсэдээтэлэ Егор Авксентьевич Павлов аҕам саастаах дьон быар куустан олорботторун, кинилэр нэһилиэк олоҕор киллэрэр кылааттарын бэлиэтээтэ, үлэ отчуотун кылгастык билиһиннэрдэ.

Биэчэргэ олохтоох дьаһалта нэһилиэккэ олорор төгүрүк саастарын туолбут кырдьаҕастары ураты чорботон эттэ, кинилэргэ тэрилтэлэр, урбаанньыттар, бааһынай хаһаайыстыбалар эҕэрдэ тылларын кытта бэлэхтэрин туттардылар.

Маны сэргэ оҕо-ыччат спортивнай кыһатын тириэньэрдэрэ Н.К.Терехова, Я.Я.Сметанин декада кэмигэр кырдьаҕастарга анаммыт бастакы спартакиада түмүгүнэн мэдээллэри, грамоталары дохсун ытыс доҕуһуолунан туттардылар.

Биэчэри култуура үлэһиттэрин, «Күбэйэ» эбээлэр түмсүүлэрин ырыалара, үҥкүүлэрэ ситэрэн, тупсаран биэрдэ.

Ыҥырыылаах ыалдьыттар бу дьоро киэһэни тэрийбит олохтоох дьаһалта, социальнай харалта исписэлиистэригэр, култуура үлэһиттэригэр махтанан тарҕастылар.

Ааптар: Татьяна Максимова-Лазарева

Добавить комментарий