Сайдыылар «Байанайдаах булчут» күрэххэ тургутустулар

Сайдыылар «Байанайдаах булчут» күрэххэ тургутустулар

Байанай ыйыгар аналлаах тэрээһиннэр саҕаланнылар. Дьааҥы уһук хотугу нэһилиэгэр Сайдыыга быйыл да  «Байанайдаах булчут» күрэҕэ ыытылынна.


Сайдыы биэс эр бэрдэ Василий Юмшанов, Константин Рожин, Николай Бурцев, Афанасий Чириков, Василий Гаврильев  «Байанайдаах булчут» күрэххэ куоталастылар. Тииҥи харахха ытар булчуттар воздушканан ытыыга араа-бараа очукуону ылан, күрэх хара маҥнайгыттан тыҥааһыннаах киирсиитэ саҕаланна.

Иккис да түһүмэххэ — мүнүүтэҕэ биэс куобах туһаҕын, салгыы биэс хапкааны иитиини уолаттар тулуппатылар. Балык дойдутун дьоно, оҕотуттан-дьахтарыттан иҥнибэккэ, тоҥ балыгы кыһыыны туохтааҕар да сатыыллар. Онон чыыры бэрт түргэнник кыһан кырылаттылар.

Аҕаларын, убайдарын көрөөрү мустубут дьон ыһыытыттан кулууп саалата биир кэм оргуйа олордо. Ыраах хаардаах систэринэн, силлиэлээх үрэхтэринэн бултуур дьон ууларыгар-хаардарыгар киирэн истилэр. Бүтэһик икки түһүмэххэ аптамаат сааны ыһыы, хомуйуу, дартс быраҕыы кыайыылаахтары быһаарда.

Эр киһи былыр-былыргыттан булар-талар, иэримэ дьиэтин, дьиэ кэргэнин халыҥ эркинэ буоларын толору көрдөрдүлэр. Түһүмэхтэри ырыа-тойук, «Сайдыяна» үҥкүү бөлөҕө «Байанай бэлэҕэ» үҥкүүнэн  (салайааччы М.В. Потапова) эбии киэргэттэ.

Алта түһүмэх түмүгүнэн кыайыылааҕынан Эр бэрдин үрдэлин бастакы аатын В. Юмшанов ылла. Иккис миэстэ К. Рожин, үһүс — Н. Бурцев. Кыайыылаахтарга сыаналаах сэртипикээт, кырааматалар туттарылыннылар. Нэһилиэк олохтоохторо: «Сыана үрдэ ойуур да, тайҕа да буолбатах. Ол да буоллар уолаттар кыахтарын бигэргэттилэр«, — диэн
кулууп үлэһиттэригэр махтаннылар. Иннокентий Петрович Стручков: «Сылтан-сыл аайы сэргэх күрэхтэри, тэрээһиннэри ыытаргыт олус үчүгэй», — диэн алгыс кэриэтэ эттэ.

Ааптар: Боотто АСХААРАП