Аммалар айар талааннаах Афанасий Кузьмины истиҥник саныыллар

Амма биллиилээх музыкана, мелодиһа, ырыаһыта, спортсмена Афанасий Кузьмин төрөөбүтэ 60 сылын туолуутунан үлэлээбит тэрилтэлэрэ ахтыы киэһэтин тэрийэн ыыталлар. Бэлиэ тэрээһини маҥнайгынан Амма 2 N – дээх оскуолата саҕалаабыта. Аны А.А.Черемных аатынан оҕо искусствотын оскуолата талааннаах кэллиэгэлэрин ахтан – санаан аастылар. Сотору уонча сыл үлэлээбит Амма 1 N -дээх оскуолата истиҥ киэһэни ыытаары эмиэ бэлэмнэнэр. Сыл түмүгэр Ф.Ф.Потапов аатынан сынньалаҥ киинэ улахан тэрээһини былаанныыр. Аны саас чаҕылхай спортсмен аатыгар дуобакка уонна остуол тенниһигэр улуустааҕы күрэхтэһии буолуоҕа.


Аммаҕа СӨ култууратын туйгуна, СӨ мелодистарын сойууһун чилиэнэ Афанасий Кузьмин – Сиэн Айылы төрөөбүтэ 60 сылын туолуутунан үлэлээбит тэрилтэлэрэ ахтыы киэһэлэрин ыыталлар. Үөрэҕин бүтэрэн аан бастаан кэлэн үлэлээбит Амма 2 N – дээх оскуолата маҥнайгынан ахтыы киэһэтин тэрийбитэ. Афанасий Афанасьевич 16 сыл айымньылаахтык үлэлээбит А.А.Черемных аатынан оҕо искусствотын оскуолата ахтыы киэһэтигэр музыкант, мелодист, ырыаһыт талааныгар сүгүрүйэр дьон саалаҕа толору муһуннулар.

Оскуола дириэктэрэ Любовь Заварзина, бииргэ ыллаан – туойан кэлбит кэллиэгэлэрэ Александра Артемьева, Анна Матвеева, биир кылааска үөрэммит Анна Александрова, бииргэ төрөөбүт эдьиийэ Анастасия Яковлева онтон да атыттар чугастык саныыр киһилэрин истиҥник ахтан аастылар.

Бу киэһэ хоһоонньуттар Евдокия Тимофеева, Дмитрий Максимов, Степан Дадаскинов, Юрий Борисов, Сэмэн Слепцов, Уйбаан Бөтүүнүскэй онтон да атын ааптардар тылларыгар ааптар суруйбут ырыаларын ыллаатылар.

Искусство оскуолатын хора, “Искорка” уонна дьахталлар вокальнай ансаамбыллара, оскуола преподавателэ Лена Скрябина, кэллиэгэтэ Луиза Яковлева иитиллээчилэрин үҥкүү бөлөҕө, нэһилиэк “Күөгэйээнэ”, “Дьүөгэлиилэр”, “Дьулуур” вокальнай ансаамбыллара, ырыаһыттар Александра Артемьева, Анна Матвеева, Николай Пухов, Анна Слепцова, Артур Боярскай, Александр уонна Сабина Борисовтар Афанасий Кузьмин ырыаларын, үһүс көлүөнэ оскуола үҥкүүһүттэрэ ааптар тупсаран оҥорбут музыкатыгар “Чороонноох үҥкүүнү” толордулар. Аны уонча сыл үлэлээбит Амма 1 N -дээх оскуолата ахтыы киэһэтин ыытаары бэлэмнэнэр. Ахсынньы ыйга Ф.Ф.Потапов аатынан сынньалаҥ киинигэр улахан тэрээһин буолара былааннанар. Афанасий Кузьмин спортсмен быһыытынан эмиэ киэҥник биллэр этэ, онон кини сырдык аатыгар саас дуобакка уонна остуол тенниһигэр улуустааҕы күрэхтэһии ыытыллыаҕа.

Афанасий түөрт кыыс кэнниттэн бэһис оҕонон төрөөбүт кыра уолбут этэ. Болугурга начаалынай кылаастарга үөрэммитэ. Төрөппүттэрбит эрдэ суох буоланнар, үөрэхпин бүтэрээт, Чурапчы Одьулуунугар пионер баһаатайынан үлэлиирбэр Афоняны илдьэ барбытым. Бэһис кылааска үөрэнэр уол оҕо күүстээх баҕа санаатын толороммун Иркутскай куоракка 90 солкуобай харчыга баян сакаастаан ылан биэрбитим. Одьулууннааҕы ОПТУ- га соҕурууттан кэлэн музыка учууталынан үлэлии сылдьар нуучча оҕонньорун кэпсэтэммин нэдиэлэҕэ иккитэ – үстэ 15 солкуобай харчыны төлөөммүн дьиэбитигэр үөрэттэрбитим. Онон ахсыс кылааһы бүтэриитигэр баяҥҥа холкутук оонньуур буолбута. Ол кэннэ Аммаҕа көһөн кэлэммит, музыка оскуолатыгар киирэн биир сыл Василий Уваровка, онтон Анатолий Черемныхха үөрэммитэ. Онтон салгыы үөрэххэ киирэн музыка учуутала буолбута. Бүгүн элбэх оҕо, дьон кэлэн кыттыбытыттан, истиҥ тыллары эппиттэриттэн олус үөрдүбүт, долгуйдубут. Быраатым, кырдьык, айылҕаттан айдарыылаах, талааннаах киһи эбит диэн кэлин сыаналыыбын. Кини ырыаларын дьон –сэргэ таптаан ыллыы сылдьалларыттан кини куруук аттыбытыгар баар курдук  саныыбыт”, – диир “РФ үөрэҕириитин туйгуна”, “Учууталлар учууталлара”, “Гражданскай килбиэн” бэлиэлэр хаһаайыннара, СӨ үөрэҕириитин бочуоттаах бэтэрээнэ, ааптар бииргэ төрөөбүт улахан эдьиийэ Анастасия Яковлева.

Ааптар: Алтана Артемьева

Сообщение Аммалар айар талааннаах Афанасий Кузьмины истиҥник саныыллар появились сначала на Ulus.Media — все главные новости из районов Якутии.