Атласовтар убаһа «куукулатын» үтэн соһуттулар!

СӨ Бэрэссэдээтэлин солбуйааччы Кирилл Бычков Атласовтар уһаайбаларыгар кэлбит ыалдьыттары ис сүрэҕиттэн «Кыһын Саха сириттэн саҕаланар» бэстибээлинэн истиҥник эҕэрдэлээтэ.

— «Саха сирин амтана» гастрономическай бэстибээл бу суолталаах тэрээһин саамай күүтүүлээх минньигэс бырааһынньыга. Хотугу норуоттар көлүөнэттэн көлүөнэҕэ бэриллэн иһэр бүлүүдэлэрин киэҥ араҥаҕа сырдатар, хотугу киһи аһын-үөлүн билиһиннэрэр саха аһын-үөлүн үрдүкү чыпчаала, — диэн бэлиэтээтэ Кирилл Бычков.

Атласовтар уһаайбаларын сүрүн асчыта Николай Атласов бу киэһэ күннээтэ.

Саха аатырбыт асчыта Иннокентий Тарбаахап үөрэппит оҕотунан улаханнык киэн туттарын бэлиэтээтэ: «Оҕом мин туйахпын хатаран эрэриттэн олус үөрэбин. Кини уоскуйан хаалбакка, бииртэн биир ааттаах-суоллаах куонкурустарга кыттар, араас сонун ас көрүҥүн толкуйдуур», — диир.

Николай Атласов аҕата Василий Атласов «Гостеприимная Чувашия» гастрономическай куонкуруска бочуоттаах 1-кы миэстэни ылан кэлбитин бэлиэтээтэ.

Николай Атласов бэйэтин хамаандатын билиһиннэрдэ.

Уолаттар быйыл убаһа «куукулатын» уокка үтэн соһуттулар! Дьэ, ол кистэлэҥин олох арыйбаттар үһү.

Ити курдук, Атласовтар уһаайбаларыгар буолан ааспыт тэрээһин олус үрдүк таһымҥа ааста.

Елена Потоцкая, «Саха сирэ» хаһыат, edersaas.ru

0
0