Хатыҥ Арыылар салапаан суумканы утарар акция ыыттылар

Нам улууһун Хатыҥ Арыы нэһилиэгэр алтынньыттан «Вместе мы – сила» диэн ааттаах социальнай проект үлэтин саҕалаата. Бу проегы Граф Биэрэгин «Ромашка» оҕо саадын педагог-психолога Туяра Борисовна Матвеева уонна Хатыҥ Арыы нэһилиэгин МТ сүрүннүүр специалиһа Надежда Дмитриевна Сивцева оҥорон, үлэ тэтимнээхтик барар. Проект сүрүн соругунан араас социальнай статустаах нэһилиэнньэ дьонун-сэргэтин түмэн, араас хайысхалаах социальнай, культурнай о.д.а. үлэлэри ыытыы, түмүү буолар.


Проекпыт бастакы тэрээһининэн, «Эко-сумка вместо пакета» диэн экологическай акция ыытылынна. Холобура, биһиги күн аайы пакеппытын 6 солк. ылар эбит буоллахпытына, нэдиэлэҕэ 42 солк. буолар, оттон сылга 2200 солк. буолар. Онтон биһиги материалбытын 50 солк. атыылаһан сумка тигиннэхпитинэ, ол суумкабыт хас эмэ сылы быһа туһалыа.

«Эко-сумка» акциябыт бастакы кыттааччыта — ветеран учуутал Анна Ивановна Леонтьева. Кини өссө саас сумка тиктибит. Нэһилиэкпит ыыппыт акциятын тэрилтэлэр, нэһилиэк олохтоохторо, общественность күүскэ өйөөтө. Номнуо «Саха» НКИХ «Талбан» биэрии биһиги акциябыт туһунан инстаграмтан көрөн, Viber мобильнай приложениенан быһа эфиргэ тахсан кэпсээн диэн ыҥырыы ыыппыттара. Кыһыл Дэриэбинэ далбар хотуттара, нэһилиэк ветераннара, общественноһа «Сайдыы» СК мустаннар 20 суумканы тигэн, Комсомол күнүнэн кырдьаҕастарыгар туттарбыттарын туһунан кэпсээтилэр.

Граф Биэрэгин «Ромашка» оҕо саадын коллектива төрөппүттэр тикпит суумкаларын ветераннарыгар бэлэхтээтилэр, акцияҕа кыттыһалларын биллэрэн, форум кыттыылаахтарыгар анаан хас да суумканы туттардылар.  Нэһилиэкпитигэр «Эко-сумка» акцияҕа Кыһыл Дэриэбинэ далбар хотуттара, Хатыҥ Арыытааҕы оҕо искусствотын оскуолатын коллектива, Намнааҕы техникум, Граф Биэрэгин «Ромашка» оҕо саада, Хатыҥ Арыы нэһилиэгин ветераннара, пенсионердара, общественноһа көхтөөх кыттыыны ыллылар.

Сэтинньи 15 күнүгэр Туяра Борисовна Матвеева республикатааҕы   «Женщины долины Туймаада: Консолидации во имя детей» дьахталлар  форумнарыгар баран кыттыыны ылла. Форумҥа нэһилиэк ветераннара, пенсионердара тикпит суумкаларын, форум кыттыылаахтарыгар үөрүүлээх быһыыга-майгыга туттартаата. Форум кыттыылаахтара сөҕөн-махтайан махтал тылларын тиэрдибиттэр, акцияны өйүүллэрин биллэрбиттэр.

И.Е. Винокуров аатынан кыраайы үөрэтэр музейга «Вместе мы — сила» социальнай проект иккис тэрээһинэ буолла. Ийэ күнүн чэрчитинэн, «Сам себе визажист» маастар-кылаас ыытылынна. Намтан маастардар Марина Егоровна Федорова, Любовь Алексеевна Хохолова, Күннэй Анатольевна Кривошапкина, Светлана Васильевна Софронеева @beauty_line_namtsy маастар-кылаас ыыттылар. Бу күн элбэх оҕолоох ийэлэргэ Т.Н. Чириковаҕа, В.И. Андрееваҕа, Л.С. Тихоноваҕа, Р.Е. Кривошапкинаҕа кыраһыабай буолуу кистэлэҥин көрдөрдүлэр, макияж, прическа оҥордулар. Түөрт оҕолоох ийэ В.И. Андрееваҕа салон аатыттан «Наращивание ресниц» курска кэлэн үөрэнэригэр босхо сертификат туттардылар.

Олохтоох дьаһалта аатыттан маастар-кылаас ыыппыт кыргыттарга махтал сурук, бары кыттыбыт ийэлэргэ сибэкки туттардылар. Проектар олоххо киирэллэригэр күүс-көмө буолар Т.Б. Матвееваҕа, нэһилиэк олохтоохторугар, тэрилтэлэргэ махтал тылларын этэбит. Бу курдук бары бииргэ буоллахпытына күүспүт уоҕурар, өссө күүс ылынан салҕыы иннибит диэки барабыт.























Ааптар Надежда СИВЦЕВА

Сообщение Хатыҥ Арыылар салапаан суумканы утарар акция ыыттылар появились сначала на Ulus.Media — все главные новости из районов Якутии.