Хаҥаласка Монголияттан ыалдьыттар кэллилэр

Сэтинньи 27 күнүттэн ахсынньы 3 күнүгэр диэри Чингэлтэй оройуонун 61-с №-дээх орто оскуолатын дириэктэрэ Аюуш Мөнхчимэг салайааччылаах улахан бөлөх Хаҥалас улууһугар кэлэ сылдьар.


2015 сыллаахха Монголия норуодунай өрөспүүбүлүкэтин киин куората Улаанбаатар, Чингэлтэй оройуонун кытта меморандум түһэрсиллиэҕиттэн ыла улуус  аҕа баһылыга Г.Ю. Алексеев уонна  Чингэлтэй оройуонун баһылыга  Ж. Эрдэнабат  ыкса сибээстээхтик үлэлииллэр.

Дьокуускай куоракка кинилэр, монгол хомуһун чөлүгэр түһэриигэ аналлаах “Возродим Хэл Хуур” Саха өрөспүүбүлүкэтин хомус уустарын быыстапкатыгар, киэһэ Хомус күнүгэр аналлаах кэнсиэргэ кытыннылар.

«Хомус абылыыр дьүрүскэнэ» норуоттар икки ардыларынааҕы куонкуруска улуус оскуолатын үөрэнээччилэрэ кыттан, бириистээх миэстэлэргэ тигистилэр. Оҕолору Покровскай куоракка баһылык Гаврил Алексеев көрүстэ, бэлэх-туһах туттарда.

СӨ бастакы бэрэсидьиэнэ М.Е. Николаев архыып-бибилэтиэкэтигэр, Өктөмнөөҕү лиссиэйгэ сырыттылар, уонна  “Хомус доҕоттору түмэр” киэҥ бырагыраамалаах кэнсиэркэ кытыннылар.

Бүгүн “Хотой” олимпийскай солбуктары бэлэмниир өрөспүүбүлүкэтээҕи анал оҕо спортивнай оскуолатыгар (дириэктэр А.А. Куприянов) тхэквондоҕа, дзюдоҕа уонна джиу-джитсу көрүҥнэригэр эрчиллиилэри көрүөхтэрэ. Манна, биир дойдулаахтара Монголия спордун маастара Шардар Гансух ситиһиилээхтик үлэлиир.

Уйбаан Уйгуурап.

Сообщение Хаҥаласка Монголияттан ыалдьыттар кэллилэр появились сначала на Ulus.Media — все главные новости из районов Якутии.