Италия култууратын, историятын билэллэринэн сөхтөрдүлэр

Сахабыт сирэ тыйыс тымныыта, тумарык тумана аан дойду омуктарын интэриэһин урут да, билигин да умсугутар, дьиктиргэтэр. Ордук аҕыс ый хамсаабат хартыынатын, тоҕус ый тохтообот тымныытын уонна туманы тулуйар дьонун-сэргэтин интэриэһиргииллэр. Санаан да көрдөххө, аҕыс ыйы быһа аҥаардас хаары көрөр салгымтыалаах буолуон сөбө.

edersaas.ru

Торулас тостор тымныы сымныы быһыытыйан, салгын дьэҥкэрэн, уулусса нөҥүө дьиэлэр чуолкай көстөр буолбут күннэригэр бырааһынньык аһыттан аккаастанан, килиэп барахсан амтанын ахтан, улахан уолларын маҕаһыыҥҥа ыытан баран, күнүскү аһылыкка сахалыы ыргыччы буһарыммыт мииннэриттэн эти хоточчу хоторон олордохторуна, арай, дьиэлэрин аана тэлэс гына түстэ да, кус-хаас тойуктаах түөрт лаһыгырас улахан киһи киирэн кэллэ. Хаһаайыннар уонна ыалдьыттар икки өттүттэн соһуйан саҥа аллайа түстүлэр.

Дьэ, “ынах маҥыраһан, киһи кэпсэтэн билсэр” диэн манныгы этэн эрдэхтэрэ. Ыалдьыттар тылбаасчыттаах сылдьар буоланнар, бэрт сотору өйдөстүлэр, билсистилэр. Биһиги дьоммут саха дьонун сиэринэн, киириҥ, ааһыҥ, кэпсээҥ диэн буоллулар. Оттон кэлбит дьон тугуй, ханныгый диэн утары ыйыталаһан киирэн бардылар. Кырдьыга да, орто дойду олоҕор мээнэҕэ, соһуччу диэн өйдөбүл суоҕун бу түгэн өссө төгүл дакаастыыр диэн санаам олох бөҕөх. Санаан да көрүҥ 6-7 тыһыынча нэһилиэнньэлээх, тыһыынчанан дьиэлээх-уоттаах нэһилиэккэ Италияны история эрэ өттүттэн буолбакка, футболистарын ааттарыгар-суолларыгар тиийэ, ааһа баран ырыаһыттарыгар тиийэ, өссө ааһа баран аны итальянскайдыы ырыа ыллыыр дьоҥҥо Екатерина Васильевна уонна Любомир Петрович Санниковтарга киирэн кэлбиттэр. Санниковтар уоллара Айтал оскуолаҕа үөрэнэр, Айаал уһуйаан иитиллээччитэ.

Любомир Петрович ыалдьыттары тоҥ балыгынан күндүлээтэ. Аны ону хайдах астыырын барытын видеоҕа, хаартыскаҕа түһэрэн вспышка уота биир кэм чаҕылыҥнаан олордо. Тымныыбытын туһанан, аһы таһырдьа хаһааналларын көрөн сөхтүлэр. Аны муус кыстанан, сааһыланан турарын эмиэ олус интэриэһиргээтилэр.
Хаһаайын ыалдьыттарга доруобуйа харыстабылын, үөрэхтээһин систиэмэтин, этэргэ дылы, ытыска ууран олорон, ырытан, кэпсээн сөхтөрдө. Сөҕүмүнэ даҕаны, арай биһиги атын дойдуга тиийэн бастакы киллэрбит хайа баҕарар ыалбыт ити курдук дириҥник, хорутуулаахтык эппиэттэһэр буолалларын саарбахтыыбын.
Дьэ, онон туох да омуна суох, Италияттан кэлбит ыалдьыттарга Саха сирин дьонун-сэргэтин, олоҕун-дьаһаҕын олус үчүгэйдик кэпсээбиттэригэр, көрдөрбүттэригэр, дириҥ билиилэринэн сөхтөрбүттэригэр Санниковтарга саха дьонун аатыттан дириҥ махталбытын тиэрдэбит уонна бары үтүөнү, үтүмэн үчүгэйи, доруобуйаны баҕарабыт.

“Саха сирэ” хаһыакка, edersaas.ru cайтка анаан Наталья РУФОВА.

0
0