Өрөспүүбүлүкэҕэ атыы-эргиэн, аралдьыйар кииннэр сабыллыахтара

Ил Дархан Айсен Николаев коронавирус салгыы тарҕамматын туһугар аһылыгы уонна күннэтэ туттар табаары атыылыыр маҕаһыыннартан ураты атыы-эргиэн кииннэрэ сабыллалларын туһунан биллэрдэ.

«Өрөспүүбүлүкэ Суһал ыстаап мунньаҕар ыарыы түргэнник тарҕанарын тохтоторго дьон дьиэҕэ олорорун ситиһиэхтээхпит диэн кэпсэттибит. СӨ Кылаабынай санитарнай бырааһа Маргарита Игнатьева сүбэтинэн, кулун тутар 28 күнүттэн муус устар 6 күнүгэр диэри, Саха сиригэр барытыгар атыы-эргиэн кииннэрэ үлэлэрин тохтотуохтара. Аһылык уонна күннэтэ туттар табаары атыылыыр маҕаһыыннар эрэ хаалыахтара», — диэтэ кини.

Ону таһынан, дьаарбаҥкалар, успуордунан дьарыктанар кииннэр, хайыһардыыр, хаҥкылыыр, сынньанар сирдэр, фитнеһинэн эрчиллэр саалалар, кулууптар, сауналар, бассейннар, көмпүүтэр кулууптара, парикмахерскайдар, СПА уонна кэрэ буолуу салоннара, илбийэр, массаастыыр хостор, оҕо уһуйааннара (чааһынайдар) бары үлэлэрин тохтотуохтара.

Уопсастыбаннай аһылык тэрилтэлэрэ дьон сылдьарын тохтотон, аһылыгы дьиэҕэ тиэрдэн биэрэргэ көһүөхтэрэ.

Хаартыска: debri-dv.com

Марианна Тыртыкова, «Саха сирэ» ха7ыат, edersaas.ru

 

 

 

0
0

Сообщение Өрөспүүбүлүкэҕэ атыы-эргиэн, аралдьыйар кииннэр сабыллыахтара появились сначала на Эдэр Саас.