mediaҮөһээ Бүлүүгэ ыһыахха Тыва бөҕөстөрө хапсаҕайдыы кэлиэхтэрэ
Үөһээ Бүлүүгэ, өрөспүүбүлүкэ хапсаҕайын уйатынан ааттаммыт улууска, бэс ыйын 24-25 күннэригэр уһулуччулаах политическэй уонна государственнай деятель Исидор Бараахап төрөөбүтэ 120 сылыгар аналлаах ыһыахха Тыва бөҕөстөрө кытталлара былааннанар. Барыта биэс ыйааһыҥҥа Үөһээ Бүлүү икки хамаандатын кытта хапсаҕайдыахтара.
Николай Николаев, Үөһээ Бүлүүтээҕи успуорт управлениетын начаалынньыга:
— Улууспут улахан ыһыаҕа аһыллыан биир күн иннинэ, бэс ыйын 23 күнүгэр, хапсаҕайга улахан, ураты күрэхтэһии буолаары турар. Тыва уопуттаах, күүстээх бөҕөстөрө кэлэн биһиги уолаттарбытын кытта тустуохтара. Үөһээ Бүлүүттэн икки хамаанда кыттыаҕа. Маҥнайгы хамаанда састааба биллэр, иккис бу күннэргэ чуолкайданыа. Тыва хамаандатын биллэр-көстөр бөҕөс, СӨ чөмпүйүөнэ Дмитрий Петров арыаллаан аҕалар. Бу күрэхтэһиигэ СӨ хапсаҕайга федерациятын толорооччу дириэктэрэ Алексей Мостахов кыттыаҕа. Сүрүн бириис 100000 солкуобай.
Улуус ыһыаҕар үс иилээх хапсаҕай көрүҥэр күрэхтэһии ыыттыллыаҕа, нэһилиэктэр бөҕөстөрө күүстээҕи быһаарсыахтара.
Күрэхтэһии «Үс хоһуун» стадиоҥҥа ыытыллыаҕа.
Тыва хамаандатыгар 62 киилэҕэ РФ сумоҕа успуордун маастара, сумоҕа РФ бастыыр иһин ыччакка үс төгүллээх уонна Европа ыччакка чөмпүөнэ Монгуш Айдыс, 72 кг сумоҕа аан дойдутааҕы кылаастаах маастар, РФ үс төгүллээх чөмпүйүөнэ Дангыт-оол Начын, 84 киилэҕэ РФ сумоҕа спордун маастара, РФ уонна Европа сумоҕа үс төгүллээх чөмпүйүөнэ Ондар Аржаан, «Борец слон» титуллаах, Тываҕа «Хуреш» национальнай тустуу хас да төгүллээх чөмпүйүөнэ Чаан Моге, сумоҕа аан дойдутааҕы кылаастаах маастар, РФ биэс төгүллээх уонна Европа үс төгүллээх чөмпүйүөнэ Кара-Сап Эрес, «Борец Сокол» титуллаах Тываҕа «Хуреш» национальнай тустуу хас да төгүллээх чөмпүйүөнэ Начын Моге, 92 киилэҕэ сумоҕа аан дойдутааҕы маастар, РФ уонна Европа үс төгүллээх чөмпүйүөнэ Куулар Кузечи кэлиэхтэрэ.
Үөһээ Бүлүү маҥнайгы хамаандатыгар 62 киилэҕэ юниордарга хапсаҕайга СӨ икки төгүллээх чөмпүйүөнэ, Манчаары оонньууларын иккис миэстэлээх призера Иван Сергеев, 72 киилэҕэ хапсаҕайга СӨ спордун маастара, СӨ хапсаҕайга хас да төгүллээх призера Рустам Прокопьев, 84 киилэҕэ көҥүл тустууга РФ спордун маастара, хапсаҕайга СӨ спордун маастара, Манчаары оонньууларын чөмпүйүөнэ Платон Саввинов, 92 киилэҕэ көҥүл тустууга РФ спордун маастара, хапсаҕайга СӨ спордун маастара, Манчаары оонньууларын чөмпүйүөнэ Иннокентий Иннокентьев, 92 киилэттэн үөһэ көҥүл тустууга РФ спордун маастара, Манчаары оонньууларын чөмпүйүөнэ, хапсаҕайга СӨ спордун маастара Увар Тимофеев киириэхтэрэ.
Тывалар былыр-былыргыттан ис истэриттэн тустуук омуктар. Онон тустуу улахан түһүлгэтин күүтэбит.
Ааптар: Александр Тарасов.
