mediaМэҥэ-Хаҥалас улууһун II Тыыллыма нэһилиэгин Xаатылыма сэлиэнньэтин олохтоохторо ааспыт бээтинсэҕэ “Көмүс күһүн” бырааһынньыгар кытыннылар.
Тэрийээччилэр – оскуола-сад кэлэктиибэ уонна олохтоох кулууп дириэктэрэ Ф.П.Спиридонова, “күһүҥҥү киһи күлбүтүнэн”, диэбиттии, бырааһынньык бырагыраамата киэҥ, интэриэһинэй, баай-талым буоларыгар олус кыһаллыбыттар. Ол курдук, холобур, кырачааннар — детсад оҕолоро, күһүҥҥү тиэмэҕэ авангард муода көрдөрдүлэр. Оттон оскуола үөрэнээччилэрэ — бука бары борщ ингредиеннэрэ буоланнар, сөхтөрдүлэр уонна бэртээхэйдик бэйэлэрин билиһиннэрдилэр.
Оҕолор үҥкүүлээн бүтээттэрин кытта биир саамай минньигэс түгэн – дьиҥнээх борщ иһиитэ буолла.
Кырачааннар төрөппүттэринээн көмүс күһүн бэлэҕинэн — оҕуруот аһыттан арааһы фантазиялаан оҥорбуттар, манна отон барыанньалаах минньигэс бөрүөк, хортуоппуйдаах бэрэски бэлэмнэниллибит, бэл диэтэр кабачоктан оҥоһуллубут хараабыл уста сылдьар!
—Бырааһынньыкпытыгар нэһилиэк кырдьаҕастара, ытыктанар дьоммут — сэрии огдообото, үлэ бэтэрээнэ Александра Васильевна Григорьева, 40 сыл устата детсад иитээччитэ, үлэ бэтэрээнэ Полина Николаевна Ксенофонтова кэлэн ыалдьыттааннар, биһигини да үөртүлэр, бэйэлэрэ да астыннылар, — диир оскуола-сад дириэктэрэ Валентина Дмитриева.
“Көмүс күһүн” тэрээһини детсад иитээччитэ Екатерина Черкашина уонна кулууп дириэктэрэ Фаина Спиридонова иилээн-саҕалаан ыыттылар.
Манна «тыыннаах муннук» эмиэ баар, оҕолор хоруолукчааннарын олус таптыыллар!
Оттон түмүккэ, төрөппүттэр, оҕолор икки хамаандаҕа арахсан, араас спортивнай оонньууларга күрэхтэстилэр.
Эдэрдиин-эмэнниин бары бииргэ оонньоон, чэбдик салгыҥҥа сүүрэн-көтөн, дуоһуйа сынньанан, олус астык күн буолла, дэһэллэр хаатылымалар.
Татьяна Афанасьева, edersaas.ru
