Хаандыга кырдьаҕастара садуобаҕа күрэхтэстилэр
Өрөспүүбүлүкэҕэ Кырдьаҕастар декадалара түмүктэннэ. Томпо оройуонун киинигэр Хаандыгаҕа садуобаҕа күрэхтэһии буолла. Төһө да кыттааччы аҕыйаҕын иһин, күрэхтэһии тэтимэ, илин-кэлин түсүһүүтэ сыппаабата. Кыайыылаахтар бириистэри туттулар.
Хаандыгаҕа түөрт чаастан ордук барбыт садуобаҕа күүрээннээх күрэхтэһии кыайыылаахтарынан дьахталларга Матрена Кузьминична Саввина, онтон эр дьоҥҥо саҥа аат Юрий Самсонович Курчатов буоллулар. Син балачча барбыт киирсии сылаас чэйдээх, астаах буолан, саастаах дьону сылаппата.
Күрэхтэһии саҥа ааттары таһаарарынан кэрэхсибиллээх. Бу сырыыга Ю.С. Курчатов чахчы кыахтааҕын көрдөрдө. Дьахталларга М.Е. Власова табыллан оонньоон, дьүөгэлэрин соһутта.
Хаандыга бэтэрээннэрин сэбиэтин бэрэссэдээтэлэ С.П. Иванова дьаһалынан барда. Филиппова Марина Романовна олоххо киллэрдэ. Судьуйанан В.А. Хаджеев үлэлээтэ. Кыайыылаахтарга, кыттааччыларга өйдөбүнньүк бэлэхтэри, махтал суруктары туттардылар.
Ааптар: Степан Никифоров.
Марина Филиппова хаартыскалара.