Уус Алдаҥҥа Сбербаан саҥа офиһын арыйда
Уус Алдан киинигэр Бороҕоҥҥо бары өттүнэн хааччыллыылаах сбербаан саҥа офиһа арылынна. Баан урукку Мигалкин 24-тэн Ленин аатынан уулусса 28/1, ол эбэтэр, “Ростелеком” дьиэтин 1-кы этээһигэр көстө.
Сбербаан саҥа дьиэтэ аныгы бары ирдэбилгэ сөп түбэһэр тиэхиньикэнэн, банкомааттарынан хааччылынна. Маны кэккэ килийиэннэргэ баан араас өҥөлөрө түргэнник оҥоһуллар буолла. Офис 9:00-17:00 диэри эбиэтэ суох субуотаттан, баскыһыанньаттан ураты үлэлиир. Оттон банкомааттары нэдиэлэ устата күнүстэри-түүннэри туһаныахха сөп.
Саҥа офис туһунан Сбербаан Саха сиринээҕи отделениетын атыыга уонна хааччыйыыга начаалынньыга Анрдей Елистратов маннык бэлиэтиир: “Биһиги бааммыт өҥөлөрүнэн туһанааччыларга табыгастаах буоларын туһугар, биһиги сөптөөх миэстэни буламмыт, өрөмүөннээн саҥа дьиэлэннибит. Өрөбүлэ суох түүннэри-күнүстэри үлэлиир банкомааттар килийиэннэрбитин үөрдэллэригэр бигэтик эрэнэбин”, – диэтэ. Чахчы даҕаны сбербаан табыгастаах сири булан арыллыбыт. Мантан СЭС, полиция, поликлиника чугастар.
Сбербаан өҥөлөрүнэн туһаныы уочарата аччыа уонна саҥа банкомааттар, терминааллар алдьаммакка, харгыһа суох үлэлиэхтэрэ диэн олохтоохтор эрэнэллэр.
Ааптар: Айаал МОЛОКОТИН