mediaМуома улууһугар култуура эйгэтин таһыма сэргэҕин исписэлиистэр бэлиэтээтилэр
Муома улууһугар Норуот айымньытын республикатааҕы дьиэтин үлэһиттэрэ кэлэн, култуура эйгэтин специалистарын аттестациялаатылар, идэ таһымын үрдэтиигэ куурус аахтылар, төгүрүк остуолу тэрийдилэр. «Осикат» этно-культурнай кииҥҥэ, библиотекаҕа, музейга, Арчы дьиэтигэр, о.д.а. сылдьан баар балаһыанньаны билистилэр, кыһалҕалары, ситиһиилэри кэпсэттилэр.
Хонууга Дьокуускай куораттан норуот айымньытын дьиэтин үлэһиттэрэ иһитиннэрэр-методическай, фондовай отдел сэбиэдиссэйэ С.П. Егорова, специалист А.К. Захаров уонна СР библиотечнай дьыалаҕа салайар киинин сэбиэдиссэйэ Г.Ф. Леберьева кэлэн үлэлээн бардылар. Кинилэр «Һэку» (Улахан Чыыстай нэһилиэгэ), «Радость тундры», «Тэтим» норуот ансамблларын үҥкүүлэрин, ити кэннэ Т.К. Апросимова аатынан Муоматааҕы норуодунай театр туруорууларын –Вильям Шекспир айымньытынан «Гамлет: олох икки өрүттэрэ» (режиссер Ольга Андреева) уонна Мария Нулгынэт суруйуутунан «Өлбүт куорат» (режиссер Николай Нестерев) испэктээктэри – сыаналаатылар.
Иһитиннэрэр-методическай уонна фондовай отдел сэбиэдиссэйэ С.П. Егорова Муомаҕа урут кэлэ сылдьыбыт. «Култуура үлэтэ эһиэхэ сэргэх. Олоххо киирэр уларыйыылары судургутук ылынан иһэҕит, саҥаҕа бэлэмҥит. Атын оройуоннарга саҥа саҕалааһыннарга ыарырҕатааччылар», – диэтэ Сардаана Петровна. Итини таһынан кини Муомаҕа үлэлиир «Һэку», «Радость тундры», «Тэтим» ансамбллар үҥкүүлэрин көрбүттэрин эттэ. Ансамбллар таһымнарын бигэргэтиини үс сылга биирдэ ааһаллар. Бу сырыыга бары бигэргэтиини аастылар.
Бүгүҥҥү күн туругунан республикаҕа докумуону сокуоҥҥа эппиэттиирдии сатаан толоруу ирдэнэр итиэннэ цифровой культураны сайыннарыы ыытыллар. «Культура» национальнай бырайыагы олоххо киллэрэргэ үлэ барар. Итиннэ олоҕуран оройуоннааҕы культура үлэһиттэрэ аттестацияны аастылар, ресурснай-бырайыактыыр киин (РПЦ) нөҥүө идэ стандартарыгар үөрэннилэр.
Эдэр специалист А.К. Захаров Муомаҕа сырыытын бу курдук кэпсээтэ:
— Мин манна аан бастаан кэллим уонна Муоманы наһаа сөбүлүү көрдүм. Тула бүтүннүү хайа дойду эбит. Үлэм хайысхатынан народнай театрдары кытта үлэлиибин. Муомаҕа культура салаатын таһыма үчүгэй дии санаатым. Материальнай-техническэй базата эппиэттиир.
Республикаҕа үчүгэй үлэлээх народнай театрдартан Тааттатааҕы театры бэлиэтиибин. Кинилэр П.А. Ойуунускай «Улуу Кудаҥса» айымньытынан испэктээги туруорбуттарыгар элбэх киһи оонньообута, ол иһигэр нэһилиэк баһылыктара оонньообуттара кэрэхсэбиллээх. Оттон манна Т.К. Апросимова аатынан народнай театр туруорбут «Гамлет: олох икки өрүттэрэ» испэктээгэр сырыттым, артыыстартан Алексей Варламов оонньуутун биһирээтим. Эһиги народнай театргыт, ыраах олорор буолан, киин сиргэ биллибэккит. Онно тиийэн көрдөрөргө өйөбүл наада.
Нөҥүө күн Алексей Константинович народнай театр артыыстарыгар сөпкө тыыныыга, тыыныы эрчиллиилэригэр, өйтөн оҥорон көрүүгэ маастар-кылаас ыытта.
Дьокуускайтан кэлбит культура специалистара түмүк күн суруйааччы Мария Федотова-Нулгынэт айымньытынан народнай театр режиссера Николай Нестерев туруорбут «Өлбүт куорат» испэктээгэр сырыттылар, тус санааларын эттилэр, театр коллективыгар салгыы ситиһиини баҕардылар. Оттон Хонуу бөһүөлэгин олохтоохторо Зашиверскай куорат төрүттэммитэ 380 сылыгар суруллубут уонна туруоруллубут айымньыны астына көрдүлэр.
Ааптар: Т. СЛЕПЦОВА.
Хаартыскаҕа: А. К. Захаров, С. П. Егорова, А. Н. Корякин, И. Н. Слепцова.
