Үөһээ Дьааҥыга сири нүөлсүтүү үлэтэ ыытыллыаҕа
Үөһээ Дьааҥы улууһун баһылыга Г.И. Чириков тустаах департаменнар кыттыылаах «Сири нүөлсүтүү уонна сүөһү аһылыгын бэлэмнээһин» тула кэпсэтии сүбэ мунньаҕар сырытта. Тыа хаһаайыстыбатын хайысхатынан уонна тыа сирин инники сайдыытыгар киэҥ хабааннаах үлэ ыытыллыытыгар улахан соруктар тураллар, дьаһаллар ылыллаллар.
«Быйылгы сайын уустук кыһалҕаларын өйдөөн, тустаах министиэристибэлэр, департаменнар Дьааҥы улууһугар утары хардыыны оҥордулар. Кинилэр өйөөһүннэринэн сири нүөлсүтэн ходуһа сирдэрин туһаҕа таһаарыыга бырайыак үлэтин ыытыы уонна инники өттүгэр бу хайысхаҕа үбүлээһин боппуруоһугар көмөлөһөллөрүн биллэрдилэр. Адыаччы, Боруулаах, Чөрүмчэ, Остоолбо сирдэрин нүөлсүтүүгэ күүстээх үлэни ыыталларыгар дьаһалталарга сорудах бэрилиннэ. Үлэ чэрчитинэн, ааҕан төһө үп эбии көрдүүрбүтүн суоттаныахтаахпыт. Адыаччы, Боруулаах нэһилиэктэригэр нүөлсүтүү быһыытынан быһыттары, нээкириктэри саҥардан оҥоруу бырайыактааһынын үлэтигэр сөбүлэҥ түһэристибит. Ыытыллыахтаах үлэ бастакы түһүмэҕэ: хамыыһыйа бу күннэргэ тахсан сирдэри көрөн, тэхиниичэскэй чинчийии аага оҥоһуллуоҕа. Салгыы тустаах департамент бырайыактааһыны ыытарыгар дуогабар түһэрсиэхпит. Иккис түһүмэх: икки өттүттэн үбүлээһиҥҥэ департаменнар көмө көрөргө бэлэмнэрин эттилэр. Нэһилиэктэргэ улуус, өрөспүүбүлүкэ таһымыттан үбүлээһини түмэммит бу күһүҥҥүттэн икки улахан нэһилиэккэ — Адыаччы, Боруулаах сирдэригэр нүөлсүтүүнү саҕалыыбыт. Остоолбоҕо Улахан Сыһыы нүөлсүтүллүбүтэ. Кэлэр сылга Кумахха уу киллэрэн ходуһа сирэ туһаҕа тахсарын былаанныыбыт. Чөрүмчэ дьаһалтата Департамены кытта үлэлэһэн, бырайыактыыр биригээдэ кэлэн үлэтин саҕалыахтаах. Маны таһынан, кэккэ нэһилиэктэр түргэн дьаһал ылынан күһүҥҥүттэн нүөлсүтүү үлэтин саҕалыыр былааннаахтар. Министиэристибэҕэ А.П. Атласовы кытта көрсүһүүгэ сүөһү аһылыгын бэлэмнээһин, кыстыкка киллэрии, сүөһүттэн ылыллар бородуксуйаны астааһыҥҥа, үбүлээһиҥҥэ кэпсэтии ыыттыбыт. Арассыыйаҕа ыытыллар национальнай бырайыактарга 2020 сылга кыттарга сайаапка түһэрсэргэ кэпсэтистибит.
Дьаһалта бу сорудахтары табатык туһанан, улуус иһигэр тэрээһин үлэтин кэмигэр сөптөөхтүк ыытан, сүөһүнү этэҥҥэ кыстатан таһаарар соруктаах», — диэн кэпсэтиини улуус баһылыга Гаврил Ильич Чириков түмүктүүр.
Кэпсэттэ Раиса Чирикова