Табалаахха үс хайысханан киирбит уоту умуруораллар

Дьааҥыга Табалаах сирэ-дойдута быйылгы улахан ойуур баһаардарыттан күүскэ эмсэҕэлээтэ. Уот үс хайысханнан киириитэ кутталы үөскэттэ.

Бастакы хайысха — Мээтис учаастагар, салгыы сылгылар мэччийэр Тойон күөл, Орто күөл сирдэригэр чугаһаабыт уоту тохтотуу үлэтэ ыытыллар. Иккис хайысха — Алчахтаах, Хоспохтоох сирдэриттэн салгыы Туостаах сүнньүгэр айанныыр уот кутталы үөскэтиэн сөп. Арҕаа өттүгэр үчүгэй, баараҕай мастаах Саһыл Арыылааҕа, Эбэ, Араҥастаах, салгыы Адыаччы Быраҥаатталааҕын тулата уонна Кунаах, Өгдөрөҥ сирдэрэ улаханнык умайдылар.

Табалаах — улуус саамай улахан нэһилиэгэ. Ханнык да алдьархайга, араас түгэннэргэ нэһилиэнньэ бүттүүн турунар. «Табалаах нэһилиэгэ» МТ баһылыга А.В. Рожина ойуур баһаарын умуруорууга уонна тохтотууга тустаах тэрилтэлэри кытта ситимнээх үлэни тэрийэр. Бу ыксаллаах быһыыга-майгыга ойуур баһаардарын бохсууга 18 МТЗ тыраахтарга тиийэ, 130 олохтоох дьон уонна өрөспүүбүлүкэттэн кэлбит 40-ча уоту умуруорааччы үлэлээтилэр. Оройуон дьаһалтата, «Авиалесоохрана» уонна «Якутлесресурс» биригээдэлэрин бөртүлүөтүнэн нэһилиэктэн нэһилиэккэ бырахтаран ойуур уотун умуруорууга улахан үлэлэр ыытылыннылар.

Ааптар: Раиса Чирикова