Муома орто оскуолатыгар педагогтар спартакиадалара буолла

Алтынньы ый муома оскуолаларын олоҕор бэрт тэтимнээхтик саҕаланна. Ол курдук Муома орто оскуолатыгар үс күн устата оскуола профкомун көҕүлээһининэн педагогтар ортолоругар Спартакиада ыытылынна.

Бу туһунан салайааччы В.В.Тихонова маннык кэпсээтэ: «Биһиэхэ педагогическай үлэһиттэр Спартакиадалара диэн буола турар. Барыта үс күн ыытылынна, учууталлар көхтөөхтүк кытыннылар. Бастакы күн учууталлар дартска, электроннай тииргэ ытыыга куоталастылар. Иккис күн өй үлэтигэр күрэхтэһии бэрт тыҥааһыннаахтык ааста. Бу күрэҕи оскуола оҕолорун төрөппүттэрин комитета (сал. С.А. Архипова) уонна оройуоннааҕы библиотека (сал. А.А. Нучеканова) тэрийдилэр. Үһүс күн учууталлар волейболга, баскетболга күрэхтэстилэр. Манна үс хамаандаҕа араҕыстыбыт: «Виктория» (капитан Ф.Н. Слепцов), «Өрөгөй» (капитан Р.Е. Слепцов), «Үрдүк чыпчаал»(капитан М.А.Тарков)».
Ити курдук Муома орто оскуолатын педагогтара үөрэх дьылын олус көхтөөхтүк, эрчимнээхтик саҕалаатылар.

Ааптар: Анна СТАРКОВА