Булуҥҥа Оҕо хамсааһына күнтэн күн хаҥаан иһэр
Арктикатааҕы гимназияҕа Тиксии оскуолаларын оҕолоругар уонна учууталларыгар Арассыыйатааҕы оҕо хамсааһынын туһунан билиһиннэрдилэр. Бэлиэтээн эттэххэ, бу хамсааһын үлэлээбитэ түөрт сыла буолла.
Арктикатааҕы гимназияҕа бу тэрээһин оонньуу быһыытынан ааста. Булуҥнааҕы оҕо хамсааһынын салайааччыта Мария Капитонова хамсааһын туһунан сиһилии билиһиннэрдэ, слайд көрдөрдө, салайар бөлөҕү кытта чопчу билсиһиннэрдэ.
Санатан эттэххэ, Бүтүн Арассыыйатааҕы уопсастыбыннай-судаарыстыбаннай оҕо хамсааһына Дойду бэрэсидьиэнэ В.В. Путин Ыйааҕынан алтынньы 29 күнүгэр 2015 сыллаахха тэриллибитэ. Ол курдук бу түмсүү инники көлүөнэ туһалаах социальнай көҕүлээһиннэрин уонна бырайыактарын өрө тутууга көмө буоллун диэн сыаллаах тэриллибит. 4 сыл тухары 85 региональнай отделение, 49 ресурснай киин, 420 первичнай отделение, 450000 бырайыак кыттааччыта, 13500 Арассыыйатааҕы оҕо хамсааһынын чэрчитинэн үлэлэһэр үөрэх кыһалара үөскээбиттэр. Бу хамсааһыҥҥа Булуҥ улууһуттан үс пилотнай үөрэх кыһата киирсэр: Быыкаптааҕы, Тиксиитээҕи маҥнайгы нүөмэрдээх оскуолалар, Арктикатааҕы гимназия.
– Арассыыйатааҕы оҕо түмсүүтүгэр биһиги улууспут 2016 сылтан саҕалаан үлэлиир. Бастакы тирэх оскуоланан (пилотнай) Быыкап, 2018 сылга Тиксиитээҕи маҥнайгы нүөмэрдээх оскуола уонна бу 2019 сылга Арктикатааҕы гимназия киирдилэр. Бу 2019-2020 үөрэх сыла саҕаланыаҕыттан улуус оскуолалара бары АОХ саайтыгар хабыстылар. Бу күннэргэ үөрүүлээх быһыыга-майгыга кырачаан актыбыыстар хамсааһын эрээттэригэр сүрэхтэннилэр. Хамсааһын чэрчитинэн ыытыллар араас күрэстэргэ, акцияларга, бырайыактарга көхтөөхтүк кыттабыт, баар хайысхаларынан барытынан үлэлэһэбит. Бу хамсааһын билиҥҥи туругунан биһиги улууспутугар күүскэ үлэлээн саҕалаата диэхпин баҕарабын. Үүнэр көлүөнэ иитиитигэр олус туһалаах, наадалаах үлэ дии саныыбын, – диэн Мария Капитонова кэпсиир.
Ону таһынан Мария Леонидовна бу түмсүүнү социальнай ситимнэргэ баар аадырыстарын билиһиннэрдэ, хайдах быһыылаах, хайа салааларга, хайысхаларга бу тэриллии үлэлэһэрин слайдынан көрдөрдө.
Дарина ЧАБЫЕВА
Ааптар хаартыскаҕа түһэриитэ