Сииктээх нэһилиэгин уотун ситимин тутаах үлэһитэ

Булуҥҥа Сииктээх нэһилиэгэр уот ситимин тэрилтэтэ алта үлэһиттээх, кинилэртэн Виктор Горнаков 1992 сыллаахтан үлэлиир. Горнаковтар нэһилиэк тарбахха баттанар биир дьоһун ыала. Үс оҕолоохтор, биэс сиэннээхтэр.

---

Виктор Васильевич үлэтин 1979 сыллаахха Сииктээх агропромышленнай хаһаайыстыбатыгар саҕалаабыта. Онтон 1980-1982 сыллардаахха аармыйаҕа сулууспалаан баран, урукку тэрилтэтигэр үлэтин салҕаабыта. Сииктээх нэһилиэгэр уот ситимигэр 1992 сыллаахха кэлбитэ, онтон ыла манна үлэлиир. Маҥнай төрдүс разрядтаах маастар-энергетигинэн сылдьыбыта, 1997-1999 сыллардаахха Сииктээхтээҕи дизельнэй электростанция салайааччытынан олорбута. 2004 сыллаахтан  үһүс разрядтаах машиниһынан үлэлии-хамныы сылдьар.

“Үлэлиирин устата Виктор Васильевич бэйэтин үчүгэй эрэ өртүнэн көрдөрдө. Булуҥнааҕы электростанция уопуттаах исписэлииһэ, эппиэтинэстээх үлэһитэ. Үрдүк таһымнаах энергетик, эдэрдэргэ сүбэһит-амаһыт, тэрилтэ киэн туттар киһитэ”, – диир “Сахаэнерго” салайааччыта Александр Казаков.

Кыратыттан туочунай наукаларга үчүгэй эбит. Олоҕун аргыһын Анна Ивановнаны кытта биир нэһилиэккэ тэҥҥэ улаатан, сүрэхтэрин холбоон 1987 сыллаахха ыал буолбуттара. Виктор Васильевич – тапталлаах кэргэн, үс оҕо амарах аҕата, биэс сиэн эһэтэ. Ыал ийэтэ нэһилиэк оскуолатын алын кылааһын учуутала.

“Идэбин сөпкө талбыппыттан үөрэбин, үлэбин сөбүлүүбүн, олох кэмсиммэппин. Биһиги уот ситимигэр сыһыаннааҕы барытын оҥоробут. Бииргэ үлэлиир эдэр дьоммор сүбэ-ама буолан, билиибин барытын тиэрдэ сатыыбын. Кинилэр биһиги үлэбитин салҕыахтара турдаҕа,” – диир Виктор Горнаков.

Ааптар: Харысхан ПОПОВ.