Саха дуолан бухатыырын туһунан кинигэ сүрэхтэниитэ буолла
Аҕыйах хонуктааҕыта киин куорат дьаһалтатын мунньахтыыр саалатыгар Саха Өрөспүүбүлүкэтин норуотун хаһаайыстыбатын үтүөлээх үлэһитэ, суруйааччы Дмитрий Наумов хомуйан оҥорбут “Айаал Лазарев Азия континенын дуолан бухатыыра…” диэн саҥа альбом-кинигэтин сүрэхтээһин буолла. Тэрээһини В.М. Новиков-Күннүк Уурастыырап аатынан Амматааҕы кииннэммит бибилэтиэкэ үлэһиттэрэ иилээн-саҕалаан ыыттылар.
edersaas.ru
Айылҕа маанылаабыт кэрэ сирэ, Кыыс Амма хампа күөх кытыла былыр-былыргыттан күүстээх, сымса дьонунун аатырыан аатырара. Амма тустууга оскуолатын сайдыытыгар бэйэлэрин хара көлөһүннэрин тоҕон, сыраларын ууран дьоһун кылааттарын киллэрсибит, элбэх үрдүк таһымнаах түһүлгэлэргэ кыайыы өрөгөйүн тутан, Аммаларын аар-саарга аатырдыбыт Захаров Николай Семенович-Сахаачча, Давыдов Николай Михайлович, Максимов Дмитрий Гаврильевич, Скрябин Михаил Степанович, уо.д.а бөҕөстөрүнэн биир дойдулаахтара киэн тутталлар. Кинилэр ситиһиини сиэттиспит суолларын бүгүн дьоһуннук салгыыр, ыччат дьоҥҥо холобур буолар уолларынан аан дойдуга биллибит тустуук, Азия континенын чөмпүйүөнэ, хас да төгүллээх призера, Рио-де-Жанейротааҕы сайыҥҥы Олимпийскай оонньуулар кыттыылаахтара Айаал Лазарев буолар.
Кинигэ ааптара Дмитрий Наумов көрсүһүү кыттыылаахтарыгар туһаайан бу кинигэни көрбүт дьоҥҥо Айаал улахан спортан тохтоон эрэр дуу диэн санаа үөскээбит эбит диэтэ, онуоха сүрүннээн спорка карьераларын түмүктээбит спортсменнар урукку кыайыыларын-хотууларын эрэдьиэстээн кинигэ таһааралларынан быһаарда. Итиэннэ, Айаал туһугар оннук буолбатах диэн туран, биир дойдулаахпытын, ыарахан ыйааһыҥҥа сахалартан бастакынан аан дойду түһүлгэтигэр суолу солообут Айаал Лазаревы спортсмен, киһи быһыытынан, спорка хайдах үлэлээн маннык ситиһиигэ кэлбитин дьоҥҥо-сэргэҕэ быһаарар, билиһиннэрэр инниттэн оҥордум диэн чиҥэтэн бэлиэтээтэ, Айаал олоҕун суолун чыпчаалыгар үктэнэн эрэр кэмигэр дьоно-норуота биллин, киниэхэ бэйэтин санаатын, алгыһын тириэртин диэн суруйдум диэтэ. Этиитин “Бүгүн ити кинигэ атыылана турар, ону ылыҥ. Айаал Бөтүрүөбүс биһикки автограф биэриэхпит. 2020 сылга Токиотааҕы Олимпиада кыттыылааҕа Айаал Лазаревтан ылбыт кинигэбит диэн таһааран ууран тураарыҥ эрэ”, — диэн түмүктээбитин көрсүһүү кыттыылаахтара дохсун ытыс тыаһынан көрүстүлэр.
Тэрээһиҥҥэ Амма улууһун баһылыга Николай Архипов, Р.М. Дмитриев аатынын олипийскай солбук училищетын дириэктэрэ Алексей Филиппов, РФ, СӨ үтүөлээх тириэньэрэ Иван Сивцев, Айаал аҕата Петр Лазарев, спортка сиэтэн киллэрбит чугас киһитэ, СӨ үтүөлээх тириэньэрэ Иннокентий Кочкин, суруналыыс Иван Ущницкай, уо.да а. санааларын үллэһиннилэр.
Түөрт түһүмэхтэн турар кинигэттэн спорду сэҥээрээччилэр биллиилээх бөҕөс спортка аартыгын арыйсыбыт дьонун санааларын кытта билсиэҕэ, араас сылларга бэчээккэ тахсыбыт тустуук кыайыы, хотторуу эҥэрдэспит суолун ырытар ыстатыйалары, интервьюлары ааҕыаҕа. Саҥа таһаарыыга Айаал Лазарев олоҕун кэпсиир элбэх өҥнөөх хаартыскалар хото киллэриллибиттэр.
Альбом-кинигэ “Компания “Дани-Алмас”ХЭУо типографиятыгар 500 ахсаанынан бэчээттэннэ. Кинигэни Айаал ийэлээх-аҕата Анна Петровна, Петр Васильевич Лазаревтар, өрөспүүбүлүкэҕэ биллэр меценат, урбаанньыт Руслан Еремеевич Федотов, Амма улууһун дьаһалтата үбүлээн таһаартардылар.
Роман Попов
Василий Кононов хаартыскаҕа түһэриитэ.
