mediaБу күннэргэ «Сахамедиа» холдинг рекламаҕа уонна сурутууга эппиэттээх салайааччылара уонна «Саха сирэ» хаһыат суруналыыстара Үөһээ Бүлүү улууһугар командировкаҕа сылдьабыт.
Сүрүн сорукпут — «Якутия» уонна «Саха сирэ» хаһыаттарга сурутуу.
Реклама сулууспатын салайааччыта Андрей Петров быйылгы сурутуу сонун сүүрээннэрин билиһиннэрдэ.
— Эһиилигиттэн босхо хаһыаттарга эбии 40 сирэйдээх «Саха сирэ» уонна «Якутия» хаһыаттар урукку балаһаларынан уонна сыһыарыыларынан сурутуунан төлөбүрдээх тахсар буолуохтара. Былаас уорганнарын норуоту кытта ситимниир, биир тыынныыр хаһыаттары улуустарга сурутан ааҕар буолуохтара, — диэн иһитиннэрдэ.
«Үөһээ Бүлүү улууһа» МТ баһылыга Владимир Поскачин:
— «Биһиги, сахалар, биир сомоҕо буолуохтаахпыт», — диэн өрүү бэлиэтиир биһиги биир дойдулаахпыт, өрөспүүбүлүкэ Ил Дархана Айсен Николаев. «Саха сирэ» хаһыат биһиги улууспутун кытта биир ситимнээх. Биир дойдулаахпыт Исидор Барахов сахалыы тыллаах бастакы хаһыаты төрүттээбит киһинэн буолар. Ол кэнниттэн «Кыым», онтон «Саха сирэ» хаһыаттар саха норуота сайдыытын иһитиннэрэн-биллэрэн кэллилэр. Саха дьонун биир тыынныыр, сомоҕолуур «Саха сирэ» хаһыаты сурутууну Үөһээ Бүлүү дьоно-сэргэтэ өйүөҕүҥ, — диэн тэрилтэ салайааччыларын ыҥырда.
— Кэлиҥҥи кэмҥэ батсаап ситимигэр тахсар араас иһитиннэриилэри ааҕан баран, дьон-сэргэ сэмээр «Саха сирэ» бүтэһиктээх хоруйун кэтэһэр буолла. Былааһы уонна норуоту ситимниир, дьоҥҥо кырдьыктаах иһитиннэриини оҥорор хаһыат бу боппуруоһу хайдах ырытта? Былаас уорганын эппиэттээх салайааччыта маныаха туох диэн хоруйдаата диэн, ааҕааччыбыт саамай эрэнэр хаһыатынан буолла, — диэн өрөспүүбүлүкэ биллэр суруналыыһа, «Саха сирэ» хаһыат суруналыыһа Василий Никифоров санаатын тиэртэ.
Улуус дьаһалтатын актыыбын уонна тэрилтэ салайааччыларын кытта көрсүһүү кэмигэр «Сахамедиа» холдинг реклама салаатын салайааччыта Андрей Петров «Үөһээ Бүлүү улууһа» МТ баһылыга Владимир Поскачин сурутуу хампаанньатын ыытыыга бииргэ үлэлээһин сөбүлэҥэр илии баттастылар.
Бу маннык ис хоһоонноох суолталаах докумуону Андрей Петров улуустааҕы «Үөһээ Бүлүү» хаһыат эрэдээктэрэ Александр Тарасовы кытта эмиэ баттаста.
Суруналыыстар бу нэдиэлэ устата Үөһээ Бүлүү улууһун нэһилиэктэринэн сылдьан ааҕааччыларын кытта көрсүһүөхтэрэ уонна сурутууну тэрийиэхтэрэ.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.
