Ньурбаҕа «Көлүөнэлэр ситимнэрэ» сэргэхтик барда
Ньурбаҕа Комсомол 100 сыллаах өрөгөйдөөх үбүлүөйүн көрсө араас тэрээһиннэр тиһигин быспакка ыытыллаллар. Алтынньы 26 күнүгэр Киин библиотекаҕа «Көлүөнэлэр ситимнэрэ» тэрээһиҥҥэ урукку сыллардааҕы комсомолецтар уонна билиҥҥи кэм ыччата, медицинскэй колледж Ньурбатааҕы филиалын уонна олохтоох техникум устудьуоннара мустан бэрт сэргэх көрсүһүү буолла.
Ньурбаҕа буолбут үбүлүөйдээх тэрээһин үөрүүлээх чааһыгар комсомол райкомун бүтэһик сылларын 1 сэкиритээрэ, билигин улуус Сүбэтин бэрэссэдээтэлэ Сергей Евсеев, 1975-1980 сыллардааҕы Хорула комсомольскай тэрилтэтин сэкирэтээрэ Александр Алексеев уо.д.а. сүрэхтэн сүппэт эдэр саастарын биир кэрчик кэмин, күүрээннээх үлэҕэ көҕүлээбит комсомол кэккэтигэр үлэлэрин-хамнастарын туһунан ыччаттарга туһаайан ахтан аастылар. Ол кэнниттэн бары күргүөмүнэн туран эрэ «Эн комсомол — мин дьолум!» ырыаны толорбуттара кылгас кэмҥэ урукку кэмнэргэ бу баардыы эргиттэ.
Хамаандаларга хайдыһан «Көлүөнэ эргиирэ» күрэхтэһии эдэр сааска төнүннэрэн бары да оҕо буолан ыллыбыт. Бастакы түһүмэх, үгэс курдук, бэйэни билиһиннэриигэ хамаандалар ааттарын, девизтэрин толкуйдааһына, хамаанда ырыатын толоруу киирдэ. «Красная гвоздика» уонна «Молодая гвардия» хамаандалар капитаннара Октябрина Спиридонова, Саха сирин үтүөлээх артыыһа Борис Борисов, ол саҕанааҕы көхтөөх комсомолецтар, салайыыларынан сорудахтары иҥнэн турбакка бэркэ толордулар. Түөрт түһүмэх тухары оччотооҕу кэми эргитэн сэргэх күрэх буолла. «Комсомол, эйиэхэ хоһооммун аныыбын» диэн бэриллибит 10 мүнүүтэҕэ тута хоһоон айыы, комсомол тиэмэтигэр бириэмэҕэ «Тиллибит хартыыналар», комсомол туһунан попурри ырыалартан истээччилэр, ыллааччылар да дуоһуйууну ыллылар.
Түмүккэ «Красная гвоздика» хамаанда кыайыылааҕынан тахсан дьүүллүүр сүбэттэн минньигэс туорт бирииһи тутта. 2 очукуонан иккистээбит «Молодая гвардия» бирииһэ эмиэ туорт буолан үөрдэ. Бу туортары астаан аҕалбыт 80-с сыллардааҕы комсомолка, Хорулатааҕы комсомольскай тэрилтэ сэкирэтээрэ, бибилэтиэкэр Рея Петровна Васильеваҕа уонна 90-с сыллардааҕы комсомолка, «АЛРОСА-Ньурба» повара Ньургустана Ионовна Степановаҕа махтал сылаас тылларын аныыбыт.
Киин бибилэтиэкэ кылаабынай бибилэтиэкэрэ Раиса Мартынова бу күҥҥэ тоҕооһуннаран ыытыллыбыт «Беспокойные сердца» патриотическай онлайн-викторина түмүгүн иһитиннэрдэ. Биир эрэ күннээх викторинаҕа 40-тан тахса киһи, ол иһигэр атын улуустартан тиийэ, кыттыбытыттан Чаппандатааҕы литературнай-фольклорнай түмэл салайааччыта, пионердар түмсүүлэрин куратора, кыраайы үөрэтээччи Татьяна Сидорова кыайыылааҕынан тахсан бэлиэтэннэ.
Тэрээһин бириэмэтигэр РФ суруналыыстарын Союһун чилиэнэ, 50-с сылын хаартыскаҕа түһэриинэн үлүһүйэн туран дьарыктанар Римма Иннокентьевна Угапьева хаартыскаларын быыстапката улахан сэҥээриини ылла.
Киин бибилэтиэкэ үлэһиттэрэ тэрийбит комсомол атрибутикалаах аныгы фотозоналар, уопсай хаартыскаҕа түһүү бу тэрээһини барыбыт сүрэҕиттэн сүппэт гына үйэтиттэ.
Тэрээһини иилээн-саҕалаан ыытта кыраайы үөрэтэр салаа бибилэтиэкэрэ Маргарита Ноева. Чаппандатааҕы партийнай тэрилтэ бастакы сэкиритээрэ Руслан Павлович Иванов эҕэрдэтин таһынан кэргэнэ Валентина Афанасьевналыын хамаанда чилиэннэрин быһыытынан чаҕылхайдык күрэхтэстилэр. Баянист Тимофей Шестаков баянын сүгэн кэлэн доҕуһуолаан үгүс ырыа күүстээхтик ылланна.
Ааптар: Лариса Дорофеева.