Үөһээ Бүлүүгэ географическай диктааҥҥа 482 киһи кытынна

Үөһээ бүлүүлэр Бүтүн Арассыыйатааҕы «Географическай диктант-2018» аахсыйаҕа актыыбынайдык кытталлар. Билиилэрин тургутан улахан дьоннуун, оҕолуун уопсайа 482 киһи кытынна.

Үөһээ бүлүүлэр Бүтүн Арассыыйатааҕы географическай диктаҥҥа көхтөөхтүк кытталлар. Аахсыйа 500-кэ киһини хапта. Ол иһигэр 268 кыттааччыта улахан киһи буолан, тэрээһин ханнык да нэһилиэккэ олус сэргэхтик ааста.

Бэйэлэрин билиилэрин тургутан 32 ыйытыктаах тест толордулар. Ол кэннэ викторина, сорох оскуолаларга көрдөөх стартар, араас таһымнаах күрэхтэр ыытылыннылар. Үөһээ Бүлүүтээҕи үөрэх салалтатын информационнай киинин салайааччыта Егор Филиппов:

— Улууспут үрдүнэн 20 оскуола кыттыыны ылбыта — кэрэхсэбиллээх. Сылын аайы маннык хабааннаах тэрээһиннэргэ дьон кыттыыта элбээн иһэр. Дьон интэриэһэ үрдүүрэ — үөрэххэ тардыһыы таһыма үрдүүрүн бэлиэтэ буолар, — диэн бэлиэтээтэ.

Түмүккэ хас биирдии кыттыылаахха туоһу сурук туттарылынна. Маннык тэрээһин үөрэнээччилэргэ эрэ буолбакка, улахан дьоҥҥо эмиэ олус туһалаах, наадалаах диэн кыттыбыт дьон бэлиэтээтэ.

Ааптар: Валентина Догоюсова