Нуораҕанаҕа уһуйаан оҕолорун үлэҕэ такайыы туһунан конференция буолла

Нуораҕанаҕа «ФГОС ирдэбилигэр сөп түбэһиннэрэн оскуолаҕа киириэн иннинээҕи саастаах оҕолору үлэҕэ уһуйуу» диэн научнай-практическай конференция ыытылынна. Тэрээһини Дьокуускай куораттааҕы эбии үөрэхтээһин уонна идэ таһымын үрдэтэр Институт уонна олохтоох Галина Романова сэбиэдиссэйдээх «Кэскил» оҕо уһуйаанын кэлэктиибэ көҕүлээтилэр.

---

Мэҥэ Хаҥалас Нуораҕанатыгар буолбут «ФГОС ирдэбилигэр сөп түбэһиннэрэн оскуолаҕа киириэн иннинээҕи саастаах оҕолору үлэҕэ уһуйуу»научнай-практическай конференцияны п.н.к., лектор Дьулустан Степанович Брызгалов сүрүннээн ыытта. Амма, Чурапчы, Мэҥэ Хаҥалас оҕо иитиитин тэрилтэлэрин 62 үлэһиттэрэ кытыннылар. Конференция кыттыылаахтарын «Дьабыыл нэһилиэгэ» МТ баһылыга Сергей Сергучев эҕэрдэлээтэ.

Олохтоох коллекционердар Клавдия Ефимова, Валентина Нестерова, Наталья Поисеева быыстапка туруордулар. Наталья Киренская салайааччылаах ыччат «Аартык» түмсүүтүн ийэлэрэ бэйэлэрин илиинэн оҥоһууларын, астаабыт минньигэс астарын атыылаан дохуот киллэриннилэр.

НПК 4 секциянан үлэлээн, аҕыс түһүмэхтээх резолюция ылынан, аныгы кэм ситимнэринэн үөрэх эйгэтин үлэһиттэригэр тиэрдилиннэ.

Ааптар: Марелла Баишева