«Калейдоскоп культур» — доҕордоһуу далаһата
А.Е.Кулаковскай аатынан норуоттар доҕордоһууларын дьиэтигэр «Калейдоскоп культур» төрдүс төгүлүн ыытыллар республикатааҕы фестиваль «В единстве народов – сила России!» девиһинэн ыытылынна.
Тэрээһиҥҥэ мустубут бары ыалдьыттары «Судаарыстыбаннай дьаамсыктар удьуордара» республикатааҕы түмсүүлэрин бэрэссэдээтэлин солбуйааччы Ирина Стрекаловская, «Тыва» национальнай община бэрэссэдээтэлэ Зоя Шартан-оол, А.Е.Кулаковскай аатынан норуоттар доҕордоһууларын дьиэтин генеральнай дириэктэрин бастакы солбуйааччы Розалия Колосова истиҥник эҕэрдэлээтилэр.
Куонкуруска Саха сиригэр олорор норуоттар фольклордарын, үҥкүүлэрин, ырыаларын көрдөрөр, тарҕатар оҕо, ыччат, норуодунай, образцовай, улахан дьон самодеятельнай кэлэктииптэрэ, биирдиилээн толорооччулар, дьиэ кэргэн ансаамбыллара өрүү буоларыныы көхтөөхтүк кытыннылар. Ньүөмэрдэр «Вокал», «Хореография», «Уус-уран ааҕыы», «Норуодунай инструменнарга оонньооһун» номинацияларынан сыаналаннылар.
Куонкуруска кыттааччылары А.Е.Кулаковскай аатынан норуоттар доҕордоһууларын дьиэтин генеральнай дириэктэрин бастакы солбуйааччы Розалия Колосова, С.А.Зверев-Кыыл Уола аатынан үҥкүү национальнай тыйаатырын туруорааччы-балетмейстера Людмила Антипина, Оҕо искусствоҕа оскуолатын флейтаҕа кылааһын преподавателэ, музыкант Балдорж Хуухээ, Искусство уонна культура кэллиэһин үрдүк категориялаах педагога Светлана Степанова, А.Е.Кулаковскай аатынан норуоттар доҕордоһууларын дьиэтин информационнай-маркетинговай отделын салайар Любовь Шишигина, поэтесса Ольга Пашкевич, СӨ норуодунай артыыһа Алексей Егоров көрдүлэр-иһиттилэр, сыаналаатылар.
Фестивалы СӨ Тас сибээскэ уонна норуоттар дьыалаларыгар министиэристибэ, А.Е.Кулаковскай аатынан норуоттар доҕордоһууларын дьиэтэ тэрийдилэр.
Тэрээһин талааны, дьоҕуру арыйыыга, маастарыстыбаны үрдэтиигэ көмө-тирэх буоларын А.Е.Кулаковскай аатынан норуоттар доҕордоһууларын дьиэтин пресс-сулууспата бэлиэтиир.