Таатталар бастыҥ ньээҥкэни таллылар
Таатта улууһугар кырачаан оҕону иитэр-үөрэтэр эйгэҕэ үлэлиир ньээҥкэлэр күрэстэрэ буолан ааста. 14 уһуйаантан кыттааччылар талааннарын, билиилэрин, үлэлэригэр бэриниилэрин бигэргэттилэр.
«Сарыал» сынньалаҥ киинигэр «Солнышко» уhуйаан көҕүлээhининэн, Таатта улууһугар «Иитээччи көмөлөһөөччүтэ-2018» кырачаан оҕону иитэр-үөрэтэр эйгэ үлэһиттэрин күрэстэрэ үрдүк таһымнаахтык буолан ааста.
Маннык күрэс бу иннинэ Ытык Күөл сэлиэнньэтин иhинэн ыытыллара. Онно элбэх сэңээриини, дьон биhирэбилин ылан быйыл улууска тэрилиннэ. Күрэскэ улуус 14 уhуйааныттан кыттыыны ыллылар. Олус да талааннаах, үгүс билиилээх, үлэлэригэр бэриниилээх үтүө үлэһиттэр эбит диэн өссө төгүл бигэргэттилэр.
Күрэх түөрт түһүмэҕинэн барда: «Кыттааччыны билиһиннэрии», «Сэрэниҥ. СЭС» СанПин нуормаларын билиини тургутар боппуруостарга эппиэттээһин, «Кыыс оҕо киэргэлэ — кэрэ көстүүлээх субуллар суһуоҕа» иитиллээччи кыыс баттаҕын өрүү уонна түмүктүүр түһүмэх «Талба талаан».
Кыттааччылар бары уһуйаанынан биир санаанан ох курдук оҥостон, тэринэн кэлбиттэрэ көрөөччүлэр харахтарыгар тута быраҕылынна.
Түмүккэ ииттээччи көмөлөһөөччүтүн туһунан бастыҥ хоһоон айыыга номинацияны Ытык Күөллээҕи «Туллукчаана» оҕону сайыннарар киин үлэһитэ Анна Макарова, «Көрөөччү биһирэбилэ» номинацияҕа Ытык Күөллээҕи «Солнышко» уһуйаантан Анна Ючюгяева таҕыста, III-с истиэпэннээх диплом хаһаайкатынан Татьяна Сивцева Чөркөөхтөөҕү «Аленушка» оҕону сайыннарар киин, II-с истиэпэннээх диплом хаһаайкатынан Ытык Күөллээҕи «Чуораанчык» оҕону сайыннарар киинтэн Егасова Ирина, I-с истиэпэннээх диплом хаһаайкатынан Туора Күөллээҕи «Кэскил» уһуйаантан Алексеева Татьяна буоллулар.
Кыайыылаах үрдүк аатын Ытык Күөллээҕи «Кэнчээри» оҕону сайыннарар кииҥҥэ 24-с сылын иитээччи көмөлөһөөччүтүнэн үлэлиир, бары өттүнэн дэгиттэр талааннаах Татьяна Голикова ылыан ылла. Кыайыылаахтар дьоро киэһэ спонсордарыттан сыаналаах бириистэри, «Таатта улууһа» МО баһылыга М.М.Соров, Тааттыныскай нэһилиэк аҕа баһылыга Е.И.Павлов, Тааттатааҕы үөрэх управлениетын начальнига А.Н.Миронова бочуотунай грамоталары, эҕэрдэ суруктары туттулар.
Ааптар: Екатерина СТРУЧКОВА