Бүлүү улууһун Тоҕус нэһилиэгэр, Балаҕаччыга, бу бээтинсэҕэ дьоро күн буолан ааста. “Мастаах” тыа хаһаайыстыбатын производственнай кэпэрэтиибин 120 ынах турарыгар суоттаммыт саҥа хотонун ыраахтан-чугастан тоҕуоруспут ыалдьыттарын кытта хаһаайыстыба үлэһиттэрэ уонна олохтоохтор өрө көтөҕүллэн туран малааһыннаатылар.
Үөрүүлээх түгэҥҥэ Тыа хаһаайыстыбатын министиэристибэтиттэн сүөһүнү иитиигэ, племенной үлэҕэ департамент салайааччыта Артем Александров, “Туймаада” ҮХАПХ АУо-тан генеральнай дириэктэр Петр Ефремов салайааччылаах бөлөх уонна Бүлүү улууһун салалтата тиийэн эҕэрдэлээтилэр. Сэбиэскэй былаас эстиэҕиттэн, ол эбэтэр орулуур отучча сыл тухары улахан мааны тутууну харахтарыгар даҕаны көрө илик тыа сирин дьоно сөҕүүлэрэ-махтайыылара сөҕүмэр. Бэл диэтэр, олохтоох эмчиттэр: “Биһиги балыыһабытынааҕар да ыраас, сырдык. Суунар-тараанар усулуобуйалаах”, — диэн ымсыыра санаабыттарын быктардылар.
Тутааччы Кан Терешкин «Мастаах» ТХПК салайааччыта Максим Яковлевка «күлүүһү» туттарда
«Мастаах» ТХПК саҥа хотонун арыйыы түгэнэ
Үүт блоктаах, толору механизациялаах саҥа комплекс Тыа хаһаайыстыбатын министиэристибэтин сүнньүнэн быйыл сайын тутуллубута. Аныгылыы киэҥ-куоҥ хотону Кан Терешкин салайааччылаах “Хаҥалас-Тутуу” ХЭУо биригээдэтэ кылгас кэм иһигэр хаачыстыбалаахтык тутан биэрдэ. Тутуу тэхиньиичэскэй өттүн “Туймаада” АУо хонтуруоллаата уонна ону тэҥэ, хаһаайыстыбаҕа кыра бырыһыаҥҥа харчы иэс биэрэн өйөөтө. Тутуу ороскуотун өрөспүүбүлүкэттэн толуйуллар үбэ кэлэр сыллааҕы бүддьүөккэ көрүллүөхтээх, оттон федеральнай бүддьүөт быйылгы үбүгэр министиэристибэ көмүскээтэҕинэ тиксиэхтээхтэр.
Ыһыллыы-тоҕуллуу сылларыгар хаһаайыстыба үрэллибэккэ, күн бүгүҥҥэ диэри ньиргиччи үлэлээн кэлбитигэр улахан оруоллаах, 1981 сыллаахтан ыла харыс халбаҥнаабакка үлэлии сылдьар СӨ үтүөлээх зоотехнига Анна Осипова: “Барыта 170 ыанньыктаахпыт, онон саҥа хотоҥҥо син биир баппаттар. Сорох ынахтарбытын уонна ыччат сүөһүнү 1976 сыллаахха тутуллубут эргэ кэҥэс хотоммутугар кыстатыахпыт. Сэбиэскэй саҕана тэрилэ барыта үлэлиир этэ, саах таһаарар транспортера алдьаммыта, ынаҕы бөтүөннээх аппараатынан ыыбыт”, — диир.
«Туймаада» ҮХАПХ АУо генеральнай дириэктэрэ Петр Ефремов үтүөлээх зоотехник Анна Осиповалыын.
“Мастаах” ТХПК үлэһиттэрэ өрөспүүбүлүкэ үрдүкү салалтатын өйөбүлүнэн саҥа тупсаҕай эбийиэктэммиттэринэн махтанан туран, эһиил комплекс иккис уочарата тутулларыгар туруорсан баҕа санааларын эттилэр. Чэбдигирдии бырагырааматыгар хапсан судаарыстыба өйөбүлүн ыла сылдьар хаһаайыстыба эдэр салайааччыта Максим Яковлев иккис хотон туруохтаах сиригэр олох буорун куттарбытын, сирин чинчийтэрбитин, бырайыак оҥорторбутун иһитиннэрдэ. “Туймаада” хампаанньа генеральнай дириэктэрэ Петр Семенович Ефремов Ил Дархан АПК-ы сайыннарыы стратегиятыгар анаммыт Ыйааҕын олоххо киллэрэр инниттэн “Мастаах” кэпэрэтиип салгыы кэҥиирин өйүөм диэн эрэннэрдэ.
Василий НИКИФОРОВ, «Саха сирэ» хаһыат, edersaas.ru