Уус-Алдан баһылыга Ил Дархан туһаайыытын биһириир
Соторутааҕыта Уус-Алдан улууһун дьаһалтатын баһылыга Алексей Федотов улуустааҕы көрдөрөр-иһитиннэрэр эйгэ үлэһиттэригэр пресс-кэмпириэнсийэ ыытта. Онно улуус иһигэр тоҕоостоох боппуруостары тула кэпсэттэ. Итини сэргэ СӨ Ил дархана Айсен Сергеевич Николаев туһаайыы этиилэрин ырытыста.
СӨ Ил Дархана А.С.Николаев өрөспүүбүлүкэ парламеныгар туһаайыы этиитин улуус таһымыгар эмиэ ырыталлар, санааларын этэллэр. “Уус Алдан улууһа” олохтоох бэйэни салайыныы тэриллиитин баһылыга Алексей Федотов санаатын маннык үллэһиннэ:
— Айсен Сергеевич туһаайан этиитигэр ордук тыа хаһаайыстыбатын салаатыгар этиитин сэҥээрдим. Тыа сирин сүөһү көрөөччүлэрэ харчы аахсар сүрүн хайысхалара үүт туттарыыта буолар. Манна нолуок чааһа чопчу соҕустук этиллибитин биһирээтим. Үүт харчыта быһаччы туттарааччы счетугар барар. Онно нолуок өттүгэр ыарахаттар баар буолааччылар. Туһаайыыга экология, инфраструктура, суол, инвестиция боппуруостара таарыллыбыттара кэрэхсэбиллээх. Ити барыта холбостоҕуна, бииргэ түмүлүннэҕинэ сомоҕолоһуу суола тобуллар диэн көрөбүн.
Алексей Васильевич Ил Дархан туһаайыыта билиҥҥи олоххо, кэмҥэ тирэҕирбитэ биһирэтэр диэн бэлиэтиир:
— Айсен Сергеевич Ил Дархан солотугар киирээт таһаарбыт бастакы Ыйааҕа чөл туруктаах тулалыыр эйгэҕэ, экологияҕа анаммыта. Оттон ол тыа хаһаайыстыбатыгар чопчу сыһыаннаах, быстыспат сорҕото буолар. Туһаайыы өрөспүүбүлүкэ, улуус инники сайдыларын торумнуурга суолтата улаатан иһиэҕэ.
Ааптар: “Мүрү саһарҕата” хаһыат